Syllad naphang ka ‘eriong, julor palat 30 tylli ki iing ha SWKHD

Palat 30 tylli ki ïing ki la shah pynjulor ha ki bynta bapher bapher jong ka South West Khasi Hills District hadien ba ka lyer kaba jur kaba la synran lang bad u slap uba jur ka la ther ïa ka District ha kine ki ar sngi ba la dep. Ka tyllong khubor na ki bor sorkar ka la pyntip ba ha ka 28 tarik u Iaiong, 2025, ha ka por kumba 3:00 baje eiei mynstep, ka lyer kaba jur ryngkat bad ka jinghap slap kaba jur ka la wan lynshop ha ki katto katne ki bynta jong ka District kaba la wanrah ïa ka jingjulor ha ki 6 tylli ki ïing ha ka shnong Golsora kaba hap hapoh Ranikor Block, 4 tylli ki ïing ha Umsaw, 2 tylli ha Diwian, 1 ha Pyndensakwang, 1 ha Photjaud bad 1 ha Nongkenbah, kiba hap hapoh ka Mawkyrwat Block.

Katba ha ka 27 tarik Risaw, la iathuh ba 10 tylli ki iing ki la shah pynjulor ha ka shnong Nongkdait, 15 tylli ha ka shnong Puksora, bad 3 tylli ki iing ha ka shnong Ranikor namar ba ka lyer kaba jur bad u slap u la ther ha katei ka thain. Ki tyllong khubor ki la iathuh ruh ba ki jingkhein ki lah ban kiew namar ba ki ophisar na ki ophis jong ka Block jong baroh artylli ki Block,  kata, ka Mawkyrwat bad Ranikor ki dang iai bteng ban jurip ia ki jingjulor na ka daw jong ka jingjur jong ka lyer, hynrei kim shym la lah ban ai kaiphod namar ba ym don network ha ki babun ki jaka khamtam hapoh Ranikor Block.

Hynrei wat hapdeng kine ki jingjia ba shyrkhei, ym shym la don kano kano ka jingmynsaw ne jingiap haduh mynta ka sngi bad ki nongshong shnong ki la iarap katba lah ban pynsah ia kitei ki longing kiba shah ktah ha kane ka ‘eriong.