Pynsngewthuh paidbah ka tnad ka Koit ka Khiah halor ka jingma pang Rabbies

Ban pynsngewthuh paidbah halor ka jingma kaba shyrkhei ka jingpang Rabbies kaba lah ruh ban shim wat ia ka jingim briew lada kim shim ia ki lad jingsumar ha ka por kaba biang, mynta ka sngi ka tnad ka Koit ka Khiah lyngba ka ophis u District Medical and Health Officer (DMHO) bad ka tnad Animal Husbandry and Veterinary ki la leit ban pynlong da ka prokram ban ai jingshai sha ki paidbah ha ka shnong Killing, Ri Bhoi District. Ha katei ka programme ba la shimkhia da ka tnad ka Koit ka Khiah, la shimbynta da ka Dr. A.J Syiemlieh District Surveillance Officer, u Dr. Aiban Phancon ba la mihkhmat na ka tnad Animal Husbandry and Veterinary bad kiwei kiwei, ia katei ka programme la pynlong ha Iingdorbar jong ka shnong Killing, ha kaba la sakhi ia ka jingiashimbynta da ki nongialam shnong, ki nongshong shnong bad kiwei kiwei.

Lah ban kdew, ba kane ka jingshimkhia jong ka tnad ka Koit ka Khiah ban ai jinghikai halor ka jingma jong ka jingpang Rabbies, ka long ruh hadien ba kawei ka longkmie ka la khlad noh hadien ba ka la shah dait ha la u ksew ba ka ri tang namar bym shem la shimkhia ban ioh ia ka lad jingsumar ha ka por ba biang. Na ka liang ka Dr. AJ Syiemlieh, ka la batai shai, ba kane ka jingpang Rabbies ka long ka jingpang kaba ma kaba pur na ka jingshah dait ha ki ksew, ki miaw bad kiwei kiwei ki mrad lada ym ioh ia ka jingsumar ha ka por kaba biang lyngba ki injeksion bad kiwei kiwei kane ka jingpang ka lah ruh wat ban shim ia ka jingim jong ki briew.

Ka la kyntu ruh, ba kino kino ki briew kiba Ieid mrad bad kiba ju ri jingri ha la ki iing ki sem, ki dei ban da pyndep ia ki jingai injection ia ki mrad jong ki, khnang ban iada ia ki trai bad wat ia ki khyllung khynnah ban lait na kane ka jingpang Rabbies lada don ka jingshah dait ne shah trut ha kine ki mrad.