Ka ‘Culinary Cascade’ ha Nan Palok ka khring nongjngohkai ban mad ia ki jingbam tynrai

U Myntri Rangbah ka jylla u Conrad K Sangma hynne ka sngi ula plie ia ka Culinary Cascade 2025 ha Wards Lake ne Nan Palok bad kane ka tamasa jingbam ka la khring ia ki paidbah bad ia ki nongjngohkai ban ioh mad ia ki jingbam tynrai ba la shet da ki nongshet ba pawnam. Ka Culinary Cascade ka dei shibynta ka tamasa ban rakhe ia ka jingshet bam tynrai ha jylla Meghalaya bad ka jingdon ki kolshor ba kyrpang bad kumjuh ka jingiaid lynti ban seng kam lajong. Kaba long ka rukom shet jingbam naduh kiba rim ba jah bad ka rukom shet ia ki jingbam bad ka juk mynta. Haba kren ha ka jingialang u Conrad Sangma ula ai khublei ia ka tnad Tourism bad ia baroh kiba don bynta lang kiba la lah ban pynlong ia kane ka prokram kaba jop bad ula ong ba kane ka tamasa ka long palat ban ia kaba shu shet ia ki jingbam hynrei ka dei ruh shaphang ka kolshor, ka jingstad kaba la ngam jylliew kaba la ioh pateng na ki longshwa manshwa. Ula banjur ruh ia ka jingdonkam ban ithuh ia ki jingshimkhia bad ban ai jingkyrshan ia ki trai jong ki dukan bam (Restaurant), ki nongsengkam, ki jaka die bam bad ki nongrep bad ula ong ba ka kam jngohkai kam dei tang na ka bynta ban pynlong ia kino kino ki tamasa, hynrei kadei kata kaba donkam ban thaw ia ka sawdong sawkun kaba biang.

U Myntri Rangbah ula kyntu ia ki nongiashimbynta kynthup ia ki riewpaidbah ba kin long kum ki nongkit tiensyiem ha kum kine ki prokram bad ban pynsaphriang ia ki khana sha kylleng ki jaka namar ba ka khana kadei shaphang jong baroh ki riewshimet kiba don ha kane ka jaka. Ula pyntip ruh shaphang ka jingthmu ban ban pynbha bad pynitynnad ia ka Ward’s Lake kum ka jaka kaban kynthup ia ka jingdon ia ka jaka iaid kjat, ka jingthaw ia ki jaka ieng kali bad ki dukan kaba ki paidbah ki lah ban ioh ia ki lad. U Director ka tnad Tourism u Bah Cyril Diengdoh ula ong, ba ka Culinary Cascade ka wanrah lang ia baroh ki nongsumar bad ia ki stad ha ka shet ka tiew ha kawei ka rynsan ban pynthikna ba ki paidbah khamtam ki nongjngohkai kin ioh ia ka lad ban mad ia ki jingbam tynrai haduh ki jingbam ki bapher bapher.

Ha kane ka sngi plie ia ka Culinary Cascade, ki heh ki hain kila leit jngoh ia ki jaka die bam bapher bapher bad kila iakren ruh bad ki nongseng kam seng jam ha ka jingshet ia ki marbam. Ha kane ka sngi ka la don ruh ka jingiasyllok halor ki mat bapher bapher ha kaba yn ioh ia ki jingkren bad jingpynshai na ki nongshet kiba paw kiba kynthup ia u Jason White, Ahmedaki Laloo, Prachet Sancheti bad ka Kong Nongpiur bad kiwei kiwei bad la pynsngewtynnad bad pynbyrngia ia ki nongwnakai lyngba k ijingtem bad jingrwai na ki kaitor jong ka MGMP.