Rai ka kynhun myntri ban pynkha ia ka Director Civil Defence

Ka Kynhun Myntri hynne ka sngi ka la mynjur ia ka jingtyrwa ban pynkha ia ka kam Director jong ka Civil Defence ha ka Directorate Civil Defence  & Home Guard. U Nongai ktien ka Sorkar Jylla u Bah Paul Lyngdoh ha ki nongthoh khubor hadien ba la wai ka jingialang ka Kynhun Myntri ba ka sorkar ka la rai ban pynkylla ia ka Service Rules jong ka Directorate of Civil Defence and Home Guard, khnang ba yn lah noh ban pynkha ia ka kam Director of Civil Defence kaba pyniaid mynta da u Commandant General ka Home Guard.

Ula ong ba ki la shim ia katei ka rai kadei naka bynta ban pynjanai ia ka jingtreikam jong ka Tnad Civil Defence bad Home Guard, ka kam Director of Civil Defence kan long mynta kum kawei pat ka kam kaba kila pynkha ia kane ka kam, khnang ban lah kyntiew kyrdan ia ki Joint Director, kiba la shakri ym duna ia ka 3 snem ba kin kiew sha ka kyrdan Director. U Bah Paul ula ong ba kane kan ai mynsiem ruh ia ki Ophisar kiba la don ka jingshemphang bad jingstad ha ka jingshakri jong ki hapoh ka tnad.

Hakwei pat ka liang u Bah Paul Lyngdoh ula pynttip ba ka sorkar jylla kala ai jingmynjur ia ka Meghalaya Ayush Medical Service Rules, 2025. Ula iathuh ba ka rukom ai jingsumar tynrai kum ka Ayurveda, Homeopathy, Yoga, Naturoathy kidei kiba la khring bha bad ba la jied da ki paidbah kum kawei pat ka rukom sumar kaba mynta, kumta ka sorkar jylla kala rai ban don noh ia ka Service Rules bad yn khot ia ka da ka Meghalaya Ayush Medical Service Rules, 2025, ula bynrap.