Ha ka Matrik 5 mark nga duh Top-20, ha ka HSSLC nga ioh ia kaba nga thrang: Sophia Ñiang

Ka Sophia Ñiang kawei naka samla pule jong ka skul Govt Girls Higher Secondary School Jowai kaba la ioh rung haka thup Top-10 jong ka result HSSLC Commerce Stream bala pynbna daka MBOSE hynne ka sngi, kala pynpaw ka jingsngewnguh ia u Blei kumjuh iaki kmie ki kpa bad nonghikai halor ka jingpoi jong ka ha kane ka kyrdan da kaba ong, kane ka kyrdan dei ba kala khih lynti la slem bad haka por ba ka iakhun iaka exam SSLC ruh kala thrang bha ban ioh rung haka thup Top-20 hynrei kala duh noh tang da 5 marks. Bad ka jingduh jongka ha katei ka por ka ong lehse u Blei u dang kwah shuh shuh iaka ban trei shitom bad daka jingiai bteng jongka ban trei shitom mynta kala ioh ia kaba ka thrang. Ka iathuh ruh ba naduh klas 8 ba ka wan pule ha kane ka skul kala iohi baka compitition ka biang bha iaka, bad ka jingjur ka competition ha kane ka skul ka iarap bha ruh iaka ban nangkiew haduh ba kan da ioh kheit ia u soh jingjop ba pynhun iaka hynne ka sngi. Ha u snem 2023 baka pass iaka SSLC la mih ruh ka Commerce Stream ha kane ka skul kumta kala bteng ban pule ha kane hi ka skul daka jingsngewkmen ban ioh long ka khynnah skul ba nyngkong haka commerce stream.

 “Bad watla haka jingiaid lynti shisnem shisnem ngi mad iaki jingeh la haba iadei ki kamra klas bad kiwei, hynrei daka jingtrei shitom lang bad ki nonghikai ha ryngkat ka jingdonlang u Blei haba khatduh ngi ioh iaka jingjop kumba long mynta”. Ong ka Sophia. Haba kren ai mynsiem pat iaki para khynnah skul ka ong, “Ngi lah ban ioh jingstad la haka skul ba duna ka jinglut jingsep bad phi kiba ioh leit skul hangne khamtam kiba wan naka longïing bym kot bor ban leit shaki skul ba rem phi long kiba donbok tam ha kane ka juk rem bai skul”. Ka ong ruh dei ban sngewnguh bad ban kynmaw iaki kmie ki kpa kiba la trei shitom naka bynta ban phah skul, khamtam ia kiba wan na nongkyndong kumba maka ruh ka wan naka shnong ba sha kyndong tam ka Jylla Meghalaya ka shnong Huroi. Kumta ka kyntu iaki ban bud iaka nuksa jong ka, ban ym pynsepei iaka lad ioh leit skul, namar dang don shibun ki khynnah bym ioh iaka lad ban leit skul.

Haba ban jur ban long ki briew ba sngewnguh bad burom ia u Blei ka ong “Haoid ngi don ki kmie ki kpa bad nonghikai kiba iarap iangi hynrei ngi donkam pat ka bor kaba khamkhraw kata dei na u Blei, namar ngi wan shaka pyrthei dei lyngba jong u bad ngi im kumba long mynta ruh dei lyngba ka jingdon ryngkat jong u”. Ka la bynrap ruh da kaba ong trei shitom bad shaniah ha u Blei ban poi shaka thong, namar ka ktien ka ong ka jingngeit khlem ka jingleh kam don jingmut ei ei.