Sngewtynnad u Conrad ïa ka jingïaid shakhmat ka jingtei Tura Medical College

U Myntri Rangbah ka Jylla u Conrad K. Sangma hynnin ka sngi ula leit jurip ia ka jingtei ia ka Tura Medical College ban pynthikna ba ia kane ka jingtei dei ban pyndep noh ha ka por kaba la buh. U Myntri Rangbah u la pynpaw ia ka jingsngewtynnad halor ka jingpyniaid shakhmat ia ka kam ban tei pyndep noh ia kane ka jingtei khnang ba yn ioh sdang pyntreikam noh ia ka Medical College ha u snem pule ban wan. Ula ong “Kala jan kot sha ka 80 percent ka jingpyndep ia ka jingtei. Ka jingpyniaid shakhmat ia ka kam ka long kaba sngewhun bad ngi don ia ka jingkhmih lynti ba ki bynta kiba kongsan jong ka jingtei ia ka college yn lah ban pyndep noh hapoh jong une u snem”.

U Myntri Rangbah ula ong ba ka sorkar kala khmih bniah man la ka por ha ka jingpyniaid ia ki kam jong ka jingtei ban pynthikna ba yn lah ban pyndep katkum ka por kaba la buh bad kala pyrshang ruh ban pynkloi ia ki kam ki jam khnang ba yn ioh sdang kloi noh ia ka jingpule ha Tura Medical College. Ula pyntip ruh ba ka sorkar ka dang wad ia ki lad ban ioh ia ka jingiatreilang na ka bynta ban pyniaid bad pyntreikam ia ka Medical College hynrei ka sorkar jylla kan bat beit ia ka jinglongtrai ia ka college.

U Conrad ula ong ba ka Tura Medical College kan ai jingshakri ia ki samla pule ka Meghalaya bad ia kiba bun tam ki seat yn bhah kyrpang sha ki samla pule ka jylla ban pynthikna ba kin ioh pura ia ka lad ban ioh pule ha kaba iadei bad ka koit ka khiah. Ula ong ruh ba ka sorkar ka pynleit jingmut ban tei ia ka rukom ai jingsumar kaba paka ban pynthikna ba man la ki nongshong shnong kin ioh ia ka jingshakri kaba pura ha ka liang ka koit ka khiah.