Lum u MDC ka Mawsynram iaki nongialam shnong ban dawa Civil Sub-Division bad pynheh iaka surok

Ki nongialam shnong ka thaiñ Mawsynram hapoh ka jingialam u MDC u Bah Alvin Sawkmie hynne ka sngi ki la ia kynduh ia u Myntri Rangbah ka Jylla u Conrad K Sangma bad phah tuklar halor ka jingdawa ban kyntiew kyrdan ia ka Mawsynram Community & Rural Development Block sha ka Civil Sub-Division bad ban shna pynheh ia ka surok na Weiloi sha Balat East Khasi Hills.

Haba kren sha ki lad pathai khubor u MDC ka Mawsynram constituency u Bah Alvin Sawkmie u la ong “Nga dap da ka jingkmen ban pyntip ba u Myntri Rangbah u la ai ha ngi ia ka khubor ba sngewtynnad bad kyrmen skhem ba hapoh ka jingialam jong u, ka Mawsynram kan sa ioh ia kane ka surok ba thymmai na Weiloi sha Balat bad kumjuh ruh ban kyntiew kyrdan noh ia ka Mawsynram block sha ka Civil Sub-Division” ong u Bah Sawkmie.

U Bah Alvin u la pynpaw ba ki paidbah ka thain kin sa ioh ka jingmyntoi ba khraw lada ka Sorkar kan shim khia ban kyntiew kyrdan ia ka Block sha ka Civil Sub-Division namar kumba long mynta ki paidbah na ka thain bad ki bynta jong ka Mawsynram, ki hap ban wan shaduh sha Shillong ban pyndep ia ki kam kiba rit ba ria ruh bad kane ka ktah ym tang ia ka por hynrei wat ia ka pisa pilain ruh kumjuh bad wat ia ka bor ka sor ruh kumjuh.

U la pyntip ruh ba ka kynhun kala ioh jingtip ba la dep ban pynkhreh ia ka detailed project report (DPR) na ka bynta ban shna noh ia ka surok na Weiloi sha Balat la dep ban pynkhreh da ka sorkar bad la kular ruh ban mang ia ka pisa na ka World Bank.