Jurip Conrad ia ka Mall bad rudwah, kyntu ban pynneh jingkhuid ka Wahumkhrah

U Myntri Rangbah ka Jylla u Conrad K Sangma hynne ka sngi ula leit jurip ia ki jingtei ia ki projek ba don ha Polo kiba kynthup ia ka Polo Mall bad ka rudwah ne Riverfront Development Project ha Polo. Ha ka por mynstep, u Myntri Rangbah ula leit ban jurip ia ka Polo Mall kaba dang shu dep tei hapoh jong ka Smart City Project bad ka jingtei ia kane ka Mall ka lah dep bad ki kam ki jam ki la iaid shakhmat na ka bynta ban ai wai ia ki dukan kiba don ha kane ka Mall. Ha kane ka Mall ne Iew kan don ia ki jaka na ka bynta ki kam pynbyrngia, jaka bam bad ia ki dukan die jingdie bapher bapher.

U Conrad Sangma ula leit ruh ban jurip ia ka Riverfront Development Project ha Polo bad ula ong, ba kane ka project ka long kaba kongsan da kaba phaikhmat sha ka jinglong ka mariang, ka jingpyniaid shakhmat ia ki kam ban pynitynnad ia ka sor Shillong bad na ka bynta ka jingpynkhreh ban pynlong ia ka National Games ha u snem 2027. Ula pynpaw ia ka jingkyrmen ban lah ban pyndep noh ia ka wat kaba nyngkong ban pyndep noh ia ki jingtei harud jong ka wah bad kaba kham kongsan ka dei ka jingpynkhuid ia ka wah bad ha ka wat ka baar yn sa pynkylla ia katei ka jaka ban buh ia ki dukan, jaka bam, jaka ieng kali, hostel bad kiwei kiwei.

U Myntri Rangbah ula kyntu ia ki nongshong shnong ka jylla ban iasnohkti lang bad ka sorkar ban pynneh ia ka jingkhuid jong ka wah Umkhrah bad ban iatreilang ban pynurlong ia ka thong ba ki iadonlang kajuh.