Leit jurip u MR ia ka jingtei Secretariat ba thymmai

U Myntri Rangbah ka Jylla u Conrad K Sangma hynne ka sngi ula leit jurip ia ka jingtei Secretariat ba thymmai ha Umsawli, New Shillong Township bad ia ki surok ba don ha ka thain NST. Ha kane ka jingjurip la iadonlang ki ophisar jong ka Tnad Planning bad Urban Affairs, ha kaba u Myntri Rangbah ula khmih bniah ka jinglong jingman jong ki kam ki jam ha kaba ia dei bad kine ki jingtei bad pynpaw ia ka jingsngewhun halor ka rukom iaid ki kam ki jam baroh. Ia ka Secretariat kaba thymmai la tei ha ka jingmang pisa kaba kot t.1188 klur bad la buh por ban tei pyndep noh ia kine ki jingtei ha u pdeng snem jong u 2027.

U Myntri Rangbah ula ong hadien ba la dep ban tei pyndep ia kitei ki projek, kane ka thain ym tang ba kan kylla long ka jaka kaba kongsan ne ka Administrative City hynrei kan noh synniang shibun bha ha kaban pynkylluid ia ka Nongbah Shillong. Ula ong ruh ba kila dep ruh ba nshna ia ki surok ha kylleng ki bynta jong ka New Shillong Township bad ki dang bun ruh kiwei pat kiba dang iaid shakhmat.

U Myntri Rangbah ula ong ba kine ki surok ha katei ka jaka kidei kiban pyniasoh bad ki projek ki bapher bapher kiba don ha ka thain bad kane kan kyntiew shibun ha ka leit ka wan.U Myntri Rangabh ula leit ruh ban jurip ia ka Unity Mall bad ula leit ruh ban jurip ia ka surok kaba la shna na Ummir sha Mawkhanu, kawei na ki surok kaban pyniasoh bad ka Administrative & Knowledge City ha katei ka thain.