Pynbna ka DC da ka Free Coaching Camp ban ïarap ïa ki samla rung kam shipai

Da ka jingthmu ban pynshlur ia ki samla ba kin rung ha ka kam shipai jongka Ri India, ka Deputy Commissioner jongka East Khasi Hills District ka Kong RM Kurbah kala pyntip ban sdang ia ka Free Coaching Camp ban iarap ia ki samla ba kin pass ia ki eksamin. “Ngi kwah ban pynshlur ia kiba bun ki samla ba kin rung sha ka kam shipai ka ri bad ngi kyrpad ia ki ba kin rejistar bad ka ophis treikam ka jong ngi namar ngin sa pynlong ia ka Free Coaching Camp ba 30 haduh 45 sngi” la ong ka DC haba iakren bad ki nongthoh khubor. Kala iathuh ba ka ophis kala iohpdiang ia ki aplikeshon na ki 40 ngut ki samla kiba kwah ban wan sha kane ka Coaching Camp ban ioh ia ka jingpyntbit bad jinghikai ban lah ban pynkhreh ia ka eksamin.

Na ka liang jongu ADC u Bah Shanborlang Warjri ula ong, ka jingthmu jong ki bor District ban ai ia kane ka jingai jinghikai ka long eh ban pynsngewthuh ia ki samla ba kin don ia ki jingtip, ki sap bad ka jingpynkhreh kaba biang ban iakhun ia ka Common Entrance Exam (CEE) kaban sa wan. Ula ong, ba ki samla ka jylla kidei kiba biang ha ka jingkhlain ka met ka phad hynrei ka jingeh kaba mih kadei ba ki samla kiba wan na k ithain nongkyndong kim don pat ia ki jingtip kumno ban pynkhreh ia katei ka eksam kumta lyngba kane ka Free Coaching Camp yn ai jinghikai ia ki samla ba kin pynkhreh bha bad ban leh bha ruh ia katei ka eksam.

U Bah Warjri ula iathuh ba kila sdang ia katei ka jingai jinghikai naduh u snem 2023 bad la ai jinghikai ia ki 200 ngut ki samla bad na kitei kila don 82 ngut kiba la pass ia ka CEE bad khatduh khatwai na kitei ki 82 ngut kila don 35 ngut kiba la pass bad ioh ia ka kam.