Ym tang ïa u shimet, hynrei u drok u ktah ruh ïa ka imlang sahlang : Lat

U Lat ka Jylla Meghalaya u CH Vijayashankar hynne ka sngi, ula ong ba ka jingdih drok kam ktah tang shimet ïa ki briew hynrei ïa ka koit ka khiah jong ki longïing longsem ki samla bad iaka imlang sahlang. Haba kren ha ka prokram pynsngewthuh paidbah halor ka jingdih drok kaba la pynlong ha Raj Bhavan, u Lat u la ïaroh ïa ka jingtrei shitom jong baroh ki seng kiba ïatreilang bad ka Sorkar Jylla na ka bynta ban rat dkhong ai u drok bad ula ai khublei ia ka projek Drug Reduction, Elimination and Action Mission (DREAM) kaba la sdang da ka Sorkar Jylla ban rat dyngkhong ïa u drok bad ia ki jingdih pynbuaid hapoh ka jylla. Hashwa kane u Lat u la pynher lama ruh ia ka kali pyntip paidbah lane ka Nasha Mukt Bharat Abhiyaan Awareness Vehicle na Raj Bhavan bad kane ka kali kadei shi bynta jong ka jingpynsngewthuh ia ki paidbah ban lait na u drok.

Ïa kane ka jingïalap pyrshah drok la pynïaid lang da ka Raj Bhavan Meghalaya ha ryngkat ka jingïatreilang bad ka tnat Social Welfare, Anti-Narcotics Task Force, ka Prajapita Brahma Kumaris Ishwariya Vishwa Vidyalaya, ka DREAM mission bad ka Rajyoga Education and Research Foundation. Ka Sheela kaba dei ka Chairperson jong ka Education Wing jong ka Rajyoga Education and Research Foundation, Mount Abu kala kren shaphang ka bor na lade ban ialeh pyrshah ïa ka jingdih buaid bad ban im ka jingim kaba ïahap. La ioh jingkren na u Rangbah Shnong, Nongmihkhmat na ka seng trei mon sngewbha bad na u Commissioner & Secretary ka tnad Social Welfare u Pravin Bakshi, ha kiba la kren shaphang ki jingpyrshang jong ka Sorkar bad ki jingeh ha kaba ïadei bad ka jingdih buaid ha baroh kawei ka jylla.

La ioh ruh ia ka jingkren bad jingbatai na unongmihkhmat na ka tnad Social Welfare shaphang ka Projek DREAM bad na ka liang ka tnad Anti-Narcotic Task Force (ANTF). Kane ka jingïalang ka pyni ha ka jingpyrshang lang jong ka Sorkar Jylla, ki seng iatreilang, ki Enforcement Agency, ki kynhun niam ban pynsngewthuh, ban iada na ka jingdih drok bad ban kyntiew ia ka Meghalaya kaba koit ba khiah, kaba donbor, bad kaba lait na u droks.