Bym ïoh skhim Municipal Area, pynsngew ka VPP ha u Symbud Myntri

Ki MDC ka seng Voice of the Peoples Party (VPP) jongka Khasi Hills Autonomous District Council (KHADC) bad Jaintia Hills Autonomous District Council (JHADC), hynne ka sngi ki la leit pynsngew ia ka jingeh hakhmat jong u Symbud Myntri Rangbah ka jylla u Bah Prestone Tynsong uba khmih ia ka Tnad District Council Affairs (DCA) halor ka jingbym ioh skhim ki shnong kiba hap ha ka Municipal Area na ka 15th Finance Commission jong ka Sorkar Pdeng. Ha kane ka jingleit iakynduh ia u Bah Prestone Tynsong, la ialam ia kane ka kynhun da u CEM ka KHADC u Bah Shemborlang Rynjah, u MDC ka JHADC u Bah Andrew Shullai ryngkat ka jingdonlang u Chairman ka KHADC u Bah Strong Pillar Kharjana, ki Executive Member bad ki MDC ka seng.

Haba iakren bad ki nongthoh khubor u MDC ka JHADC u Bah Andrew Shullai ula ong, ba ka jingwan iakynduh ka jongki ia u Bah Prestone ka long ban pynsngew halor ka jingshem jingeh jong ki District Council ia ka jingbym lah ban pyntreikam ia ka skhim jong ka 15th Finance Commission namar ba la pynkylla noh ia ka, na ka Offline sha ka Online na ka bynta ki jaka kiba hap hapoh ka Municipal Area. Katba u EM ka KHADC u Bah Powell Sohkhlet ula ong ba u Symbud Myntri Rangbah ula kular ba shen un sa lum ia ka jingialang jong ka Tnad Urban Affairs bad ka Community & Rural Development ban pynbeit ia ki kam kaba iadei bad ka skhim jong ka 15th Finance Commission jong ka sorkar pdeng.

U Bah Powell ula ong, ba ki Shnong kiba hap hapoh ka Municipal Area kim ioh jingmyntoi satia na kane ka skhim namar kadei kaba la mang sha ki jaka nongkyndong katkum ki kyndon jong ka 15th Finance Commission bad kumta ki MDC na ki jaka sor kila buh jingkylli ba kumno tang ki MDC na ki jaka nongkyndong ki ioh ban pyntreikam ia kum kine ki skhim.Ula ong ba ki MDC ki don ia ka jingsngew namar bai a kane ka skhim la pyntreikam lyngba ki District Council, kumta baroh ki MDC ki kwah ban ioh pyntrei ia kane ka skhim ha ki constituency ki jongki.U Bah Powell ula iathuh ba mynshuwa ia kane ka skhim la pyntrei ha ki jak asor bad nongkyndong, hynrei, mynta pat ym lah shuh, namar ia baroh ka jingpyntreikam ia kine ki skhim, la hap ban thep lyngba ka Portal jongka Panchayati Raj.