Ym pat lah rai ka UDP ban shim bynta ha APC halor ka lynti Rel

Ka United Democratic Party (UDP) kam pat lah ban shim ia ka rai la kan leit ban iashim bynta ha ka jingialang jong ka All Party Committee (APC) jong ka sorkar jylla na bynta ban iathir halor ka jingdonkam ban wanrah ia ka lynti rel ha kane ka jylla. Haba kren lyngba ka phone, u nongialam ka UDP u bah Titosstarwell Chyne, ula ong ba ka party ha kane ka taiew ban wan kan sa shong jingialang ban iakren halor kane ka jingialang jong ka APC . “Ngin pat iashong jingialang halor kane, ngin sa rai ha ka jingialang kaban long ha kane ka taiew”, la ong u Vice President ka UDP, uba dei ruh u MDC ka Sohra u bah Tistos. Haba kylli halor ka jingbym treh leit iashim bynta jong ka Congress bad ka Voice of the People Party (VPP) ha kane ka jingialang ba la khot da ka sorkar, u bah Titoss ula ong ba um treh ban kren eiei namar ba kam dei hok ia u ban kren. “Ngam kwah ban kren halor kane namar ba ka dei ka kam jongki bad kam dei ia nga ban kren ia ka hok jongki”, u la ong.

Lah ban kdew ba ka sorkar jylla ka la thaw ia ka All Party Committee ban khlieh u Myntri Rangbah u Conrad K Sangma na ka bynta ban iathir halor kumno ban wad ia ki lad ki lynti ban wanrah ia ka lynti rel sha kane ka jylla Meghalaya, kaba la sahteng la bun snem mynta na ka jingpyrshah ki sengbhalang. Hynrei dang shen, u nongaiktien ka sorkar u bah Paul Lyngdoh ula pynpaw ia ka jingeh ban pyniaid shakhmat ia kane ka Committee hadien ba ki liangpyrshah kynthup ka Congress bad ka VPP, kila rai ban ym iadon bynta ha kane ka Committee kaba la thaw ka sorkar. Kiba la pynthikna ban iashim bynta ki dei ka KHNAM bad ka HSPDP.

Ha ka jingshisha, ka sorkar ka la thaw ia kane ka Committee ban pan jingmut na ki paidbah, ki sengbhalang bad ki kynhun bapher bapher halor ka jingthmu ban wanrah ia ka lynti rel sha kane ka jylla bad ar ngut na kawei pa kawei ka seng sain pyrthei, la phah ba kin phah ban long ki dkhot ha kane ka Committee. Lah ban kdew ba ka jingthmu ka sorkar ban wanrah ia ka lynti ha ka jylla, ka la sahkut la bun snem na ka jingpyrshah jur ki sengbhalang bapher bapher ha ka jylla. Ka sorkar India ka la pan noh ia ka pisa jongka kaba la mang kumba T.200 klur ban siew bai jaka ban shan lynti kaba la ai naduh u snem 2017.