Hadien 4 bnai ba plie mawnongrim sted ka jingpyntrei ia ka Iawmusiang Complex

Hadien 4 bnai ba plie maw nongrim ka sorkar Jylla ban sdang trei thymmai biang iaka Iawmusiang Complex kaba la sahteng da ki phew snem, haka mang tyngka ba 25 klur tam, hynne ka sngi pat naka liang u MLA ka 2-Jowai u Wailadmiki Shylla ha ryngkat ki ophisar ka tnat PWD bad u Contractor kila leit buddien halor ka jingpyntrei da kaba leit hiar ha kane ka jaka ban sakhi da la ki jong ki khmat.  Hadien bala dep sakhi daki khmat u kmen ban iohi baka kam kala iaid shait shait, bad dang hapoh 4 tylli ki bnai ba plie maw nongrim ruh la kumba hadooh 25% ka jingpyntrei na katei ka mang ba thymmai kala iaid beit.

U ong ba u dap daka jingkmen ban ioh pyndep noh ia kane iew kaba long ka jingangnud ym tang kiba shong shnong ka Jowai hynrei jong ka Rilum Jaiñtia hi baroh kawei. Haba kylli la don ne em ka jingpynkylla haba iadei bad ka rukom shna ha kane ka mang ba thymmai, u jubab ba don hi ka bynta ka mala jong kane ka building bala mang ban shna mynshwa daka tin hynrei naka daw ba ha kine ki sngi kam long kaba suk ban sumar iaki tin kumta la pynkylla noh naka tin da kaba dung slab.

Katba wei ar pat dei ki jingpynkylla barit ba ria katkum ka jingiaid ka por kumjuh ruh dei lyngba ka jingkyrpad ka JHADC. Kumba u iohi ba ka jingtrei ka long kaba sted bha, u khmih lynti ba wat lada buh por ar snem ruh, tharai u contractor wa pyntrei naba dei uba don ka bor jinglah ban trei kloi ia kano kano ka kam u khmih lynti ba tang hapoh ar snem ula lah hi ban pyndep.