Khang khyrdep ki Bor District ïa ka Khyrdop KHADC ha Umdihar

Ki bor pyniaid District hynne ka sngi ki la khang khyrdep ia kawei ka khyrdop khrong khajna jong ka Khasi Hills Autonomous District Council (KHADC) kaba la pynieng dang shen ha Umdihar ba hap ha ka surokbah National Highway-6 ha Ri Bhoi District. Ki bor pyniaid district ki la leit ban khang ia kane ka khyrdop KHADC, hadien ba ki bor pyniaid District ki la ioh jingtip ba la pynieng ia katei ka khyrdop harud ka surokbah National Highway-6 ha Umdihar, ha kaba ki la khrong khajna 200 tyngka kawei ka Trok ba kit mar kiba iaid lyngba katei ka khyrdop.

Halor kane ka jingbuh ia katei ka khyrdop, ki bor synshar District bad ki bor pulit ka Ri Bhoi mynta ka sngi ki la leit ban khang tala ia katei ka khyrdop ba la pynieng beaiñ khlem da ioh jingbit na ka sorkar khamtam ba ka dei ha ka surokbah National Highway-6 ha Ri Bhoi. Haba ia kren bad u Deputy Commissioner ka Ri Bhoi, u Abhilash Baranwal, u la ong ba ia katei ka khyrdop la leit ban khangtala noh mynta ka sngi, hadien ba la ioh jingtip ba la shu pynieng beaiñ da ka KHADC khlem da ioh bor na ki bor kiba dei peit khamtam ba la pynieng ha ka surokbah National Highway.

U la ong ruh kino kino ki kynhun ne riew shimet kin nym lah ban buh khyrdop khrong khajna ha ki surok highway ne ki surok PWD khlem da ioh bor da ki bbor bab dei peit  bad  dei namar kane ka daw mynta ka sngi la leit khang tala noh ia katei ka khyrdop kaba la pynieng ban lum khajna na ki Trok khlem da ioh bor na ki bor ba dei peit jong ka sorkar.