Pynkup burom u Lat ia ki samla pule ba wan hakhmat ha ka Matrik bad HSSLC

U Lat ka Jylla u CH Vijayashankar hynne ka sngi u la pynkup burom ia 5 ngut kiba ioh ia ka kyrdan ba ha khliehduh ha ka eksamin Secondary School Leaving Certificate (SSLC) bad Higher Secondary School Leaving Certificate (HSSLC). Ha kane ka sngi u Lat ka Jylla ula ïakren bad ai syrnod ryngkat ki jingai sngewbha sha kiba ioh ia ka kyrdan ba ha khlieh duh. Ki samla pule ba shah pynkupburom ki kynthup Saptarshi Bhattacharjee – 1st Position, HSSLC (Science), Laban Bengali Boys’ HSS, Idawanplishisha Swer – 1st Position, HSSLC (Arts), St. Edmund’s HSS, Disha Chokoni – 1st Position, HSSLC (Commerce), St. Anthony’s HSS, Leisha Agarwal – 1st Position, SSLC, St. Margaret’s HSS and Avila Kathrene P. Lyngdoh – 1st Position, SSLC, North Liberty HSS, Jowai. U Lat ka Jylla u la ai khublei ïa ki samla pule kiba wan hakhmat duh haki eksamin bad u la ai mynsiem ïa ki ban bteng ïa ka jingwad jong ki ban long kiba tbit haki kyrdan bapher bapher.“Bun na phi phin sa leit shakhmat ban long ki doktor, ki engineer, ki riewstad, bad ki riew shemphang ki ban pynlong ïa ka jylla Meghalaya bad ka jaidbynriew ban sngew sarong” la ong u Lat.

U Lat u la kdew kyrpang ia ki samla pule na ki jaka riewlum bad ki jaka ba jngai kiba la jop ia ki katto katne ki jingeh ban mih kum ki nongjop, da kaba kdew ba ka jingjop jong ki ka long kum ka jingai mynsiem. U Lat u la iaroh ruh ia ka jingtrei shitom jong ka MBOSE ban pynneh ia ka jinglong ba janai bad ka jinglong babha ha kaba pyniaid ia ki eksamin. U la pynshlur ïa ka MBOSE bad iaki jaka pule ban pynïahap kham jan bad ka National Education Policy (NEP) 2020, da kaba pynksan ïa ka jingpule ba pura, ka jingpynroi ïa ki sap, bad ka jinglong jingman ha ka jaka ha ka jingai ïa ki jinghikai, ban pynthikna ba ym don ki khynnah ba sahdien. Ka prokram pynkup burom ka la sdang ha Durbar Hall da ka jingpyni kolshor kaba shongshit bha ha kaba la pyni ia ka jingshad tynrai jong ki nong Sikkim, kaba la ioh ka jingkyrshan na ka Indian Council for Cultural Relations (ICCR), Shillong. Ha kane ka sngi la pyni ruh ia ka phlim lyngkot kaba pyni ia ki jingsdang bad ki jingjop jong ka MBOSE.

Haba kren ha kane ka sngi u Chiarman ka MBOSE u CP Marak u la ai khublei ïa ki samla pule kiba la jop ha ka jingpule lyngba ka kyrshang lang na ki nonghikai, ki ba ha iing hasem bad ki jaka pule. U Marak ula pynpaw biang ïa ka jingkular jong ka MBOSE ban long kiba shai, ban thaw thymmai, bad ban pynkylla katkum ka NEP 2020. Ha kane ka sngi la sam ïa ki syrnod bad ki song pisa sha kiwei pat ki samla pule da ki heh ophisar bad la ioh jingkren ruh na ki katto katne ngut ki samla pule. Ka jingïalang ka la long kum ka jingrakhe ïa ka jingjop ha ka jingpule bad ka jingïatreilang kaba la pynshlur ïa baroh ki nongshim bynta ban ïatreilang sha ka lawei kaba phyrnai kaba kynthup lang ïa ka pule puthi na ka bynta ka Meghalaya. Kane ka jingïalang ka long ruh kum ka jingrakhe ïa ka Foundation Day jong ka Jylla Sikkim.