Na ki jingteinam ba don ki khana pateng yn kyntiew kam jngohkai ha Iewduh

Ka Sorkar Jylla kan iamir jingmut bad ka Khasi Hills Autonomous District Council (KHADC) bad ka Hima Mylliem ban wanrah ia ki kam jngohkai na ki jingtei ba don ia ki khana pateng (heritage tourism) bad ki kam jngohkai halor ka kolshor (cultural tourism) hapoh Iewduh Shillong. Kane ka wan shisngi hadien ba ki heh Sorkar haka jinglam khmat da u Myntri Rangbah ka Jylla kila leit jurip iaka Iewduh bad la mang ruh sa T.15 klur ban pynbha bad pynitynnad iaka iew kaba heh bad barim tam hapoh ka Jylla.

Ia kane la pyntip da u Myntri ka Tnat Tourism u Bah Paul Lyngdoh bad u la ban jur iaka jingdonkam ban iatreilang bad ka jingiatehlok hapdeng ka Sorkar Jylla, ka KHADC bad ka Hima Mylliem. Haba iakren bad ki nongthoh khubor, u Bah Paul ula ong “Ki lad ki lynti ki don bun bah. Kane ka donkam ia ka jingiatreilang, ka jingiatehlok bad ki paralok ba hakhmat eh ki dei ban long ka Sorkar Jylla, ka KHADC bad ka Hima Mylliem. Shisien ba ngi la don ha kajuh ka thong, ngi lah ban phaikhmat ka ki kam jngohkai na ki jingtei ba don ia ki khana pateng bad ki kam jngohkai halor ka kolshor kum ki kam ba kongsan jong ka Iewduh”.

U Bah Paul u la ong ba ka jingleit jurip iaka Iewduh kadei kum ka sienjam kaba khraw bha ban pyniadei bad ki nongsengkam, ki nongkhaii bad ki nongshong dukan kiba kamai jakpoh man ka sngi.“Kane hooid, ka dei ka dak ka jingkwah iarap monsngewbha na ka liang ka Sorkar hynrei ngi khmih lynti ba ka Hima Mylliem bad kumjuh ruh ka KHADC kin leh iala ka jong ka bynta khnang ban nang lah weng shuh shuh ia ka jingjynjar jong ki briew ha Iewduh” ula bynrap.