Ai ka HBDRF ia ki kot bad ka map ban pynbeit pud bad ka Assam

Ka Hynniewtrep Border Disputes Redressal Forum (HBDRF) hynne ka sngi ka la phah tuklar ha u Myntri Rangbah ka Jylla u Conrad K Sangma ban pynthikna ia ka jingshngain ki nongshong shnong ka thaiñ Block I ba Block II. Ha shuwa kane u Myntri Rangbah ula lum ka jingïalang bad ki nongialam ka HBDRF ban iakren halor ka kam ia kajia u pud u sam hapdeng Meghalaya bad Assam. Haba kren shaki lad pathai khubor u Nongaiktien ka HBDRF u Bah Thomas Passah ula pyntip ha ha ka jingïalang ki la aiti ia ki sakhi satar kumjuh ruh ka map sha u Myntri Rangbah ka Jylla khnang ba ka Sorkar kan pyndonkam ia ki ha ka jingïakren pynbeit pud bad ka Jylla Assam.

U Bah Thomas u la ong ba kane ka jingaiti ia ki sakhi bad ki map ka dei ban pynsuk ia ka Sorkar Jylla ban iakren bad ka Sorkar Assam ban pynphai biang iaka Block I shaka Meghalaya. U la ong ba haka jingïalang ka HBDRF ka la ioh ban pynpaw halor ka jingkynduh jingeh ki para Khasi-Pnar kiba sah ha Block I. “Ki nong shong shnong haki thaiñ Block I bad Block II ki shah pynduh ia ki syrnod ST, Adhar, PAN Card bad kiwei kiwei de kiba long ki syrnoh kiba donkam ban ioh ki lad jingmyntoi na ka Sorkar Jylla ne Sorkar Pdeng” la ong u Bah Thomas.

U Bah Thomas u la ïathuh ruh ba ha ka jingïalang ka HBDRF ka la kyntu ïa u Myntri Rangbah ban pynbiang ia ki kam pynroi, kum ki surok, ki skul, ki jaka sumar, ka um bam um dih bad kiwei kiwei ki jingdonkam iaki shnong haki thaiñ khappud. “Tang namar ba ki sah ha ki jaka iakajia, kam mut ba kin duh noh ia ka hok jong ki, kam mut ruh ba ngin khein poh ia ki, ki don ka juh ka hok long briew man briew, kumta ka Sorkar ruh kadei ban shimkhia halor kine baroh” u la ong.