Pynrem ka KHADC ia ki bor District Ri Bhoi ba khang khyrdop lum khajna

Ka Khasi Hills Autonomous District Council (KHADC) hynne ka sngi ka la thalain bad pynrem ia ki bor pyniaid District Ri-Bhoi, da kaba ong ba ka sienjam ba ka ophis Deputy Commissioner (DC) ka shim ka dei kaba khlem akor bad ka jingibein ia ka bor bad iktiar ka District Council. Kane ka jingkynthoh ka KHADC ka dei namar ka jingshah khang dam kawei ka khyrdop lum khajna ka Council ha shnong Umdihar, Ri-bhoi District. Haba kren sha ki lad pathai khubor u Nongaiktien ka Executive Committee (EC) ba ialam da ka VPP Bah Powell Sohkhlet ula kynnoh ba ka ophis u DC Ri-Bhoi District ka khang ia ka khyrdop ha Umdihar khlem da ai ia kano kano ka Notice/jingpyntip.U Bah Powell ula ong, “Ngi (KHADC) don khyrdop lum khajna ha kylleng ki District kiba hap hapoh u pud u sam jong ka Council bad kine kim ju mad satia ia kano kano ka jingeh ha ki snem ba la leit noh. Tang mynta namar ba ka VPP ka la shimti ia ka EC ha KHADC, kane ka jingjia ka la mih”. Ula kynnoh ba kane ka jingleh ki bor district Ri-bhoi District ka pyni ia ka jingshisha ba ki bor district ki la niew ia ka KHADC kum ki Sengbhalang lane ki runar, kiba lum pisa beain.

“Ngi la lyngngoh namar ha ka por ba ngi pyntreikam ia ka khyrdop hadien ba pynthymmai, la shu khang noh dam dam. Nga suba jur ba ka don kaei re kaei ha lyndet ka jingleh jong ki bor District” u la ong. Haba pynrem ia ki Bor District ka Ri-bhoi, u Bah Powell ula ong “Ngim sngewtynnad satia ia ka jingleh u Magistrate ba don ha ka kam. Ka dei ka bym lah ban pdiang namar kum ka EC ba la jied da u paidbah, ngim shym la shah pyniaid ia ka Sengbhalang ne ki runar hangne. Sngewsih ban ong ba la I kumba ki bor District ki niew ia ngi kum ki nongpynkhein ain. Kumta, nga pynrem jur ia kane ka jingleh ki bor District”. U Nongaiktien ka EC ula kam ba ka khajna ba la lum da ka KHADC ka long katkum ki kyndon ka Sixth Schedule jong ka Riti Synshar ka Ri India. Na ka liang u Executive Member ba khmih ia ka tnat Trade u Bah Winston Tony Lyngdoh ula pyntip ba ia ka khyrdop ha Umdihar la aiwai sha u Bah Pyndailang Diengdoh ka dei kawei na ki 11 tylli ki khyrdop ba la pynieng da ka KHADC ha kylleng ki District mynta la bun bun snem.

“Ka khyrdop kam dei kaba be-ain. Ngi la ai ia ka work order kaba biang hadien ba u nongshim wai ula ioh ia ka NoC na ka Dorbar Shnong, ia kaba ki copy la phah sha ka Ophis u Deputy Commissioner ka Ri-Bhoi bad sha u Superintendent of Police, ki bym shym la pyrshah hynrei ki la phah pynban ia ki bor pahara ban iarap pahara ha ka 15 tarik Jymmang ha ka por ba sdang treikam ka khyrdop” u la ong. “Tad haduh mynta, nga dang ap ia ka jingthoh na ki bor district ka Ri-Bhoi ha shuwa ba ngi shim ia kano kano ka rai halor kane ka kam. Lada ki bor district ki pyrkhat ba ka khyrdop ka long kaba beain, thoh sha ngi namar ngi don hangne ym ban pynkhein ia ka ain” bynrap u Bah Winston. U EM ula pyntip na ki 11 tylli ki khyrdop, tang 7-8 tylli ki dei kiba la treikam. “Lai tylli ki khyrdop la iakhang hadien ka jingujor na ki paidbah. Ngi la phah ia ki nongtrei jong ngi ban leit jurip ia kiwei ki khyrdop bad ngin sa rai la ki dang long ne em ban buh” ula ong haba bynrap ba ka Council ka long kaba kloi ban iatreilang bad ka Sorkar. Nalor kane, u Bah Winston ula pynpaw ba um lah satia ban pynshai la ka KHADC ka la thoh ne em sha ka Ministry of Home Affairs (MHA) ban pan jingbit ban buh khyrdop bad bynrap “Hynrei ngi la buh ia baroh ki kyndon katkum ka ain. Ki khyrdop lum khajna jong ka KHADC ki dei kiba la don la bun bun snem”. Haba bynrap ia kane, u bah Powell ula ong ba ka KHADC ka la shu pynthymmai ia ki work order ban ai wai ia kine ki khyrdop.