Kwah ka shnong Nongspung ban pyneh bad pynitynnad ia ka Mawsangri, ka kmie u Kyllang bad Symper

Ka Dorbar Shnong Nongspung hynne ka sngi ka la kyntu ia ka Sorkar Jylla ban iarap pisa na ka bynta ban pynneh bad pynitynnad ia ka shnong Mawsangri kum shibynta pynlong kum kawei na ki jaka jngohkai pyrthei hapoh ka jylla. Haba iadei bad kane, ka Dorbar Shnong ka la aiti da ka Dorkhas ha u Myntri ka tnat Tourism u Bah Paul Lyngdoh. Ia kane ka kynhun la ialam da u MLA ka Mawphlang constituency u Bah Mathew Beyondstar Kurbah ha ka jingdonlang u Acting Sordar u Bah Johnworthborn Kharmyndai lem bad kiwei kiwei ki dkhot ka Dorbar Shnong. “Ngi kyrpad ïa ka jingïarap pisa ban kyrshan ïa kine ki jingthmu harum, kata ban iarap pisa na ka bynta ki projek pynroi kum ka jingshna ïa ka surok ban poi sha jan u lum, ka lynti iaid kjat ban poi shalor u lum ban pynsuk ïa ki nongjngohkai pyrthei bad ki nongshong shnong kumjuh, ki lynti ïaid kjat, ki jaka peitkai, ka jingshna ïa ka pung ha u lum namar nalor u lum lah ban iohi iaka thain Mawkyrwat bad ki thaiñ Mairang” la ong u Bah Johnworthborn.

U Bah Johnworthborn u la ong ba katkum ka khanatang jong ka thain, la ngeit ba ka Mawsangri ka dei ka kmie jong u Kyllang bad u Symper, ki riew pawnam ha ka pateng tynrai. “Ia kane ka khanatang la pynsah lyngba ki pateng, bad ngi ngeit ba ka jingpynneh pynsah bad pynroi ia kane kan iarap ban kyntiew iaka kolshor kaba lah ban khring ia ki nongjngohkai pyrthei bad ai jingmyntoi ia ki nongshong shnong” u la ong. “Ngi ngeit ba da ka jingpynroi bad pynneh pynsah kaba biang, ka Mawsangri ka lah ban long ka jaka jngohkai kaba pawnam, kaba kyntiew ïa ka jingmyntoi ha ka kolshor bad ka ioh ka kot na ka bynta ki nongshong shnong” u la ong.

Haba pynpaw ïa ki jingmyntoi na kum kane ka projek, u Acting Sordar u la ong ba ka jingpynneh pynsah bad pynitynnad ïaka Mawsangri ka lah ban khring ïa ki nongjngohkai pyrthei, ban wanrah ïa ka ïoh ka kot bad ban plie iaka lad ioh kam ioh jam ki paidbah nongshong shnong. “Kan iarap ha ka jingpynroi ia ki khanatang bad ki pateng jong ka thain, ka lah ban iarap ban pynneh pynsah ia ka jinglong tynrai jong ka Shnong Nongspung. Ki rukom pyniaid jngohkai pyrthei kaba neh ka lah ban ai jingmyntoi ia ki nongshong shnong, ban kyntiew ia ka roi ka par” u la bynrap.