Dawa ka JNC ban buh No Entry ha ka por long skul ki khynnah ha Khliehriat

Ka Jaintia National Council-Khliehriat Circle ha ka 21.05.25 ka la dawa na u Deputy Commisioner (DC) ka East Jaintia Hils ban buh noh da ka No Entry ha ka por long skul ki khynnah na ka bynta ki skul kiba don hapoh Khliehriat. Ka JNC, Khliehriat Circle hapoh ka jingialam jong u General Secretary, bah Symboh Baiar Sumer ki la shim ia kane ka sienjam ban dawa, hadien ba ki la ioh ia ki jingujor na ki kmie ki kpa jong ki khynnah skul, ha ka jingiadei bad ka jingeh kaba ki ia kynduh khamtam ha ka por ba ki leit buh skul bad shaw skul ia la ki khun jong ki. “Namar ka jingioh lait lan jong ki kali khamtam ki kali kiba heh, ban leit ban wan ha ka por ba leit skul bad mih skul jong ki khynnah skul kane ym tang ba ka buh jingma ia ka jingim jong ki khynnah skul hynrei ka pynlong ruh ia ka jingdheng ka kali kaba jur kaba lah ban neh da ki kynta namar ka jingioh lad ki kali heh ban iaid ha ka por leit skul jong ki khynnah skul,” ong u Symboh Baiar Sumer General Secretary JNC-KC lyngba ka kyrwoh.

Kumta ka JNC-KC da ka jingsngewkhia ka la leit ia kynduh ia u DC East Jaintia hapoh ka office trei kam jong u ban pynsngew ia kane ka jingeh kaba ki khynnah skul ki ia kynduh ha ka por ba ki leit bad mih skul man la ka sngi namar ba ki hap ban jam sha shilliang ia u surok NH-6 ban poi sha la ki jong ki skul bapher bapher, khamtam ia ki skul ba don ha Khliehriat bad mynta ba dei ruh ba dang shna ia u surok NH 6 ha Khliehriat ka jingdheng kali ruh ka jur bha namar ka jingai lad ia ki kali heh ban iaid khlem da buh por. Ha kane ka jingiakynduh ka JNC-KC ka la ai jingmut ia u DC uba dei u khlieh jong ka District ban buh da ka No Entry ia ki kali heh khamtam ha ka por ba leit ba mih skul ki khynnah skul khnang ban pynduna ia ka dheng kali bad ruh ban pynsuk ia ki khynnah skul ban poi sha la ki jong ki skul khlem kano kano ka jingma ia ka jingim jong ki, bynrap u Symboh Baiar Sumer, GS JNC-KC.

Na ka liang ka office u Deputy Commissioner ruh, u la kular ban shimkhia ia kane ka jingdawa jong ka seng ban buh da ka no entry naduh ka por 8 baje haduh 9 baje mynstep ba dei ka por leit skul ki khynnah skul bad naduh ka 2 baje haduh  ka 3 baje nohphai sngi ba dei ka por mih skul, bad ia kane No Entry na ka bynta ki kali heh yn pyntrei kam naduh mynta ka sngi.