Ka Jylla ka plie lad ia ki samla ban leit trei nurse sha Germany

U Myntri Rangbah ka Jylla u Conrad K Sangma hynne ka sngi ula plie ia ka prokram ban hikai ka ktien German ha Shillong Tech Park na bynta ki ki samla ba kwah leit trei shabar Ri. Ia kane ka prokram la kyrshan da ka Meghalaya State Skill Development Society (MSSDS) hapoh ka tnad Labour, Employment bad Skill Development bad ka jingthmu ka traning ka long ban hikai pyntbit ia ki nongtrei ka koit ka khiah shwa ban leit trei sha Germany. Kane ka long hadien ka jingjop ki samla ka jylla Meghalaya ba leit trei sha Japan bad Singapore, ka Germany ruh ka kwah ia ki nongtrei nurse na jylla ban ai jingsumar ha ka koit ka khiah sha katei ka Ri bad ha pyrthei.

U Myntri Rangbah ula kular ruh ban leit synran dalade ia ka kynhun banyngkong ki kyrtong ba la jied ban leit trei Germany.Ula ong ka jingïatreilang kan pynkhlaiñ ïa ka jingïadei hapdeng ka India bad ka Germany bad u sngewkmen ba ka Meghalaya lyngba ki samla ka lah ban kyntiew ka jingroi.

“Ka Germany ka don ha ka jingduna ki nongtrei ka koit ka khiah. Ha u snem 2035, ngin sa donkam sa 7 million ngut ki nongtrei ba tbit. Ka prokram mynta ka sngi ka pyni ïa ka jingïaid lynti ba pynkylla ïa ka jingim-kine ki samla ba trei kam kin ym trei tang ha Germany hynrei kin roi, kin noh synñiang, bad kin kiew.” ong u Andrea Jeske, Deputy Consul General uba mihkhmat ïa ka German Consulate Kolkata uba la pynpaw ïa ka jingkyrmen kaba khraw halor kane ka jingïatreilang.