T.120 klur ban pynbha ia 56 ki ophis Block na bynta ki paidbah

U Myntri Rangbah ka Jylla u Conrad K. Sangma hynne ka sngi ula plie ia ki artylli ki Block Integrated Development Complex ha East Garo Hills district, kaba don ha Songsak bad Dambo Rongjeng. Haba kren ha ka jingplie ia ka Songsak C&RD Block Complex, u Conrad Sangma ula ong, kane ka dei kawei na ki khubor kiba bha jong ka SASCI (Special Assistance to States for Capital Investment) scheme kaba la ailad ban kyntiew ia ka ophis jong ka Block, ha kaba bun ki la shah ieh bein ha ka jingjot da ki phew phew snem. Ka jylla mynta ka don 56 tylli ki Community and Rural Development (C&RD) Block bad kiba bun mynta ki la iohi ia lad ban shah maramot bad shna pynbha ia kaba la shah ieh kumto la bun snem.

U Conrad haba kren ha ka jingplie ia ka Complex jong ka Dambo Rongjeng C&RD Block, ula ban jur ia ka jingdon ia ka jingiohi jngai jong ka jylla ha kaban shna pynbha ia ki jingtei ki bapher bapher. Ula ong “Ka jingthmu hi ka long ban thaw ia ki jaka treikam kiba biang ki ban pynkup bor ia ka kynhun ka jong ngi ha ki shnong ki thaw ban ai ka jingshakri kaba bha tam ia ki paidbah”. U Myntri Ragbah ula pynbna ruh ban tei ia ki jaka sah jong ki nongtrei ha kylleng ki jaka kiba don ha ka jylla ban pynbiang ia ka iing bad ban kyrshan ia ki nongtrei sorkar kiba ai jingshakri ha ki jaka kiba don ha nongkyndong.

Kum ban shu kdew, ka sorkar Meghalaya ka la bhah T.120 Klur na ka bynta ban kyntiew bad shna pynbha ia ki Block Office kiba don ha kylleng jong ka jylla bad u Myntri Rangbah ula pynbna ruh ban bhah tyngka ban tei ia ki building jong ki 10 tylli ki C&RD Block kiba thymmai hapoh ka jylla.