Pynkhih met ki paidbah na ki jingtem bad rwai ki samla pule MLCU

Ka tnad Music jong ka Martin Luther Christian University, Shillong sa shisien ka la pynlong biang ia ka rynsan ka put ka tem kaba ju pynlong man u snem ba la tip ka “Ha Jylli ki Khriang” ha ka 13 tarik mynta u bnai, 2025 ha iing Dorbar ka shnong Wahingdoh.Ha kane ka sngi ki samla pule ki la shim bynta shitrhem ha ki put ka them ka rwai bad ki jingialehkai bapher kum ka niah saikil bad ka shad tynrai ban pyni ia ka jinglong kawei bad ka jingiatylli lyngba ki jingrwai bad ka put ka tem.

Kane ka long kum ka rynsan ia ki samla pule ban pyni ia la ka jong ka sap ha ka jingrwai ka tem ha ki ktien bapher bapher. Ki jingrwai ki kynthup ia ki jingrwai tynrai bad ki jingtem tynrai. La ioh ruh ki jinghikai na ka riew shemphang ha ka jingrwai bad la bishar bniah ruh da ki nongrwai ba pawnam na Shillong ban la ai mynsiem ia ki samla pule bad kumno ban nang pynbha shuh shuh ia ka jingtbit ia ka sap ki samla pule.

Ia ka rynsan ka rwai bad ka tem la plie ïa ki paidbah kaba la pynsngew tynnad shi katdei ia ki paidbah haduh ban pynkhih ïa ka met ka khlieh na ki jing tem bad ki jingrwai ki samla pule. Ka long ka janmiet janmiet ba kmen kum ka jingiakynduh lang ryngkat ki jingrwai ha ka por ba la leit noh hynrei ki dang ioh sngew haduh mynta. Ka long ka lad ban sah jingkynmaw bad kaba sngewtynnad ban pynkut ia ka taiew da ki jingrwai ban pynjah thait ia ka met bad ka jingmut jingpyrkhat.