Kiew ka jingwan ki nongshangkai ha thain Sohra, panmab Hynmen Raja bad ki lad pathai khubor

Wat hapdeng ka jingshah pynthohbria ka Jylla Meghalaya khamtam ia ka thain Sohra namar ka jingshah pyniap u Raja Raghuvanshi u nongjngohkai pyrthei na Indore Madhya Pradesh, hynrei ka jingwan ki nongwan shangkai pyrthei ha Sohra ka la nangkiew man ka sngi. Ia kane la ong da u Myntri ka tnat Tourism u Bah Paul Lyngdoh bad bynrap ba ka jingwan iuhkjat ki nongshangkai pyrthei la khmih lynti ba kan kot 20 lak hadien jong ka Cherry Blossom Festival ka ban long ha kine ki bnai ban wan. Haba kren sha ki lad pathai khubor u Bah Paul ula ong, “Katba ngi dang iakren hangne, ka jingwan iuh kjat ha Sohra ka la nangkiew. Ki la nangbun ki nongwan kai. Wat ha ka por bym pat lah sei madan ia ki jingshisha halor kane ka jingjia shah pyniap, ka jingwan iukjat ka dang neh kumjuh. Mynta ba ka kyrteng ka Meghalaya ka la khuid, ngi nud ban kop ba ka jingwankai ki briew kan sa nangkiew bad ngi khmih lynti kan kot 20 lak ha shuwa ka Cherry Blossom Festival”.

U Bah Paul ula ong, ka jingsdang jong ka jingdawa ka Sorkar ban panmap ka la mih hadien ka jingmih ki jingkynthoh ba laiphew jait kynthup ka jingpynshit ban thombor ia ki briew kiba dei na Meghalaya hadien kane ka jingjia ha Sohra. “Ha ka sngi kaba bud bun na ki lad pathai khubor ka Ri kynthup ka Times of India, Republic TV nalor ki blockers shimet, ki la panmap paidbah. Kumta ki la leh ia kaei kaba ngi la dawa” ula ong. Haba pynpaw ba kane ka kam ka la kut u Bah Paul ula ong, “Ngi la kren shai kdar ba lada phim panmap, ngin ujor da ka mukotduma pynmynrain khmat bad ngi la dep ujor ejahar ruh kumjuh. Mynta ki la nguid biang ia la ki kyntien kum kiba haiing jong u briew ba iap ki la panmap paidbah ia ka Sorkar bad ki briew ka Meghalaya, kane ka kam ka la kut noh hangtei”.

Nalor kane u Myntri u pyntip ba ka Jylla ka la pyntreikam ia ka Tourism App ban buh thup ia ki jingtip baroh halor ka iaid ka ieng ki nongwan shangkai, kynthup ki kali ne kiei ki kali ba ki pyndonkam bad ruh ka jingpynrung kyrteng baroh kiba wankai ha ki homestay, resort bad hotel.“Mynta, ka jingpyndonkam ia kane ka App ka dang kot kumba 50% hynrei mynta ngin pynlong kongsan noh ba baroh ki homestay, resort, hotel bad kiwei kiwei ki iingbasa ki dei ban pynryng kyrteng khlem pep ia baroh kiba wan sah” ula bynrap. Ha kajuh ka por, u Myntri ula iathuh ba ka Tnad ka la dep pynmih ia ka jingpynbna ban khot ia ki samla kiba nangkren bha ha ka Khasi, Garo, English bad Hindi ba kin wan rung hapoh ka Tourist Buddy Scheme bad hapoh kine ki ar bnai ban wan, ngin sa lah ban thungkam da ki spah ngut ki Tourist Buddies.