Leit tur ki nongdie madan ha Secretariat ban pyrshah kynriah na Khyndailad

Ki Nongdie jingdie madan na Khyndailad hynne ka step ki la tur sha Secretariat ban pynpaw ka jingpyrshah halor ka jingshah tohkit la ki don ne em ka Certificate of Vending (COV) ban shong die jingdie. Kane ka wan shisngi hadien ba ka tnat Shillong Municipal Board (SMB) bad ka tnat Urban Affairs ka Sorkar Jylla naduh ka 30 tarik Jylliew ki la pynlong ka jingkhynra ha ki thain Khyndai Lad ban bthah iak i bym don COV ban mih noh na ki jaka ba ki shong die jingdie. Lah ban kdew ba ia kiba don COV ka SMB ka la ai por haduh 22 tarik Naitung ban kynriah sha ki 2 tylli ki jaka ba la ithuh da ka Sorkar ban bteng ia la ka kam die jingdie. Ban pyrshah ia ka jingthmu jong ka Sorkar ban pynkylla ia la Khyndai Lad kum ka jaka iaid kjat (Pedestrian Zone), ki nongdie madan haka jingialam ka Meghalaya and Greater Shillong Progressive Hawkers and Street Vendors Association (MGSPHSVA) kila leit ialum hakhmat jong ka Secretariat ban pyrshah jur halor ka jingkyndang be-ain ia ki nongdie madan ha Khyndai Lad.

Ki nongdie jingdie madan bad ka MGHPHSVA kila dawa ba dei ban lum kyrkieh ia ka jingialang jong ka Provisional Town Vending Committee (PTVC) ban pynbeit ia kitei ki kynrum kynram. Haba kren shaki lad pathai khubor, ka Adviser jong ka MGHPHSVA ka Kong Angela Rangad kala ong ba u Chairperson jong ka PTVC uba dei ruh u CEO jongka Shillong Municipal Board (SMB), ula ai bor ban pynlong ia ka jingkyndang ia ki dukan khlem da iaid katkum ka lynti kaba dei. Ka Kong Angela kala banjur ba ki nongshong dukan madan kila leit mudui sha ka iingkashari ban dawa ba dei ban pyntreikam ia ka Street Vendors (Protection of Livelihood and Regulation of Street Vending) Act, 2014 bad kila iatreilang bad ka PTVC ban pyntreikam ia katei ka ain. ‘Hynrei ka jingleh jong ka SMB pat kala long pyrshah ia ka ain bad kan nang pynmih shuh shuh ia ki kynrum kynram” kala ong.

Ki nongshong dukan madan kila dawa ba dei ban pynlong mardor noh ia ka jingialang jong ka PTVC ban shimkhia ia katei ka mat bad kila byrngem lada jia ba ym shim la pyntreikam ryntih ia ka ain, kan long kaba don jingma bad kan pynmih ia ki jingeh kiba bun. Kila kynthoh ruh ia u Symbud Myntri Rangbah ka jylla uba khmih ia ka Tnad Urban Affairs u Bah Sniawbhalang Dhar halor ka jingbym shimkhia eiei ia ka jingsngewkhia ka jongki.“Ngi lah dawa ba u (Symbud Myntri Rangbah) u dei ban pan ia ki kot ki sla, khnang ba yn sngewthuh ia ka jinglong jingman jong kane ka kam haduh mynta bad ban sngewthuh ba balei ka jingleh ka jongki kaba hynin ka sngi ka long kaba be-ain bad ngi lah dawa ruh ba dei ban lum ia ka jingialang kaba kyrkieh jong ka PTVC” ong ka Kong Angdela Rangad.