Syllad ka Eriong bun ki iing bad jingthung ha shnong Umdap Dumu bad Rngi

Ka ‘Eriong ka la syllad naphang ban pynkhyllem ki iing ki sem bad ia ki jingthung jingtep jong ki ar tylli ki shnong, ka Umdap Dumu bad ka Umdap Rngi. Kane ka la jia hynnin ka Lah sngi U Blei ha ka por nohphai sngi,  ha kaba ka er’iong ka la syllad naphang ia ki hajar tylli ki dieng kwai, ki dieng bah, ki nar ding ilektrik bad ka la pynjulor ruh iaki jingthung jingtep bad iaki iing ki sem. Haba ioh ban ia kren bad ki katto katne ngut ki nongshong shnong ki la pynpaw iaka jingsngew diaw bad kthang mynsiem ba lyngba ka jingwan ban khyrwit jong katei ka er’iong ka la pynduh lut khait iaki jingthung jingtep bad khamtam ki dieng kwai, ki dieng kait bad kiwei kiwei.

Naka liang u Rangbah Shnong jong kitei ki artylli ki shnong kiba kynthup ïa u Bah Alexander Maring Rangbah Shnong  Umdap Rngi bad u Bah Angelius Maring Rangbah Shnong Umdap Dumu ki ïathuh ba katei ka jingjia ka dei ka bym pat ju jia ha ka shnong jong ki bad kane ka jingwan lyngshop ka er’iong ka la wan rah shisha iaka jingduh nong kaba khraw ïaki nongshong shnong kiba dei ki nongrep kiba dang shaniah haka kam rep ban pynbit pynbiang iaka iing ka sem. Ki la iathuh ruh, kaba pynkthang mynsiem iaki nongrep ka dei ka jingkhyllem lut ki dieng kwai kiba ba la sdang ban sei soh namar ban sdang thung thymmai ia u dieng kwai kam dei kaba suk namar ba hap ban ap la kumno kumno 10 snem eiei ba un sdang soh bad nalor kine ka jingkhyllem lut ki dieng kait kiba la sdang ban soh bad ka jingjulor jong ki tymmpew ka la wan rah shisha iaka jingjaw ummat jong ki nongrep haka shnong jong ki.

Naka liang kitei ki arngut ki Rangbah Shnong ki la kyrpad ia ki tnad sorkar ba dei peit ia kum kine ki jingjia ba kin shimkhia mardor ban leh eiei naka bynta kine ki briew kiba la shah pynjulor ki jingthung jingtep bad ki iing ki sem bad ki la kyrpad jur ruh khamtam iaka Ophis ka Umling C&RD Block bad ïaki nongmihkhmat kiba kynthup ia u MLA bad MDC ka Nongpoh ba kin ïarap pynioh lem iaki lad jingiarap naka bynta ka shnong jong ki khnang ba kan nym da ktah than iaka ioh ka kot jong ki longing kiba ngat ia katei ka apot.