Shah khang saw ki dukan, kynthup ka jaka shet ka RB Store

Ka tnad Food Safety ka jylla hynne ka sngi ka la phah khang khyrdep ia saw tylli ki dukan ha thain Khyndailad, Shillong bad la phah sahngeh ruh ia kawei ka dukan shet jingbam ka RB Store. Kitei ki dukan ba shah khang ki dei jong ki bar jylla ba kynthup ia ka Arun Hotel, Maa Kali Hotel bad ar tylli pat ym don kyrteng, nalor ka jaka shet jingbam ka RB Store.Ia kitei ki dukan, ka tnad Food Safety ka la phah khyrdep hadien ba la lap ba ki dukan ki jaboh bad kam don ka jinglehkhuid ha ka bam ka dih.

Ka tnad Foof Safety hapoh ka jingialam ka Kong DBS Mukhim ka Deputy Commissioner ka tnad lem bad ki heh ka tnad Food and Safety,  ki la pyllong ia ka jingjurip ia kine ki dukan bad ki la lap ruh ia ka jingijli bad i sait met  na ka jingjaboh bad tngit kitei ki dukan.Ka Deputy Commissioner ka Food Safety, ka kong DBS Mukhim ka la shim ia kane ka sienjam ba tyngeh ban phah khang khyrdep ia kitei ki dukan namar ka jingbym bud ia ki jingbthah ba kidei ban lehkhuid khnang ba kan ym buh jingma ia ki briew kiba bam ba dih ha kitei ki dukan.

Na ka liang ka Food Safety ka la bthah ia kine ki dukan ba kin khang khyrdep haduh ba kin da pynbiang lut ia baroh ki jingbthah kynthup iaki kot ki sla bad ka jingkhuid. Ha kane ka sngi, ka tnad Food and Safety ka la jurip ruh ia ka jaka shet jingbam ka RB Store bad la lap ia ka jingbym biang ka jaka shet jingbam ha kaba ki pyndonkam bad sop ia ki Cake bad ka tnad ka la bthah ban sangeh shi syndon ia ka jingshet jingbam.