Kyntu u MR ia ki bor District, sengbhalang bad VDP ban peitngor ioh wan rung ki mynder na Assam

U Myntri Rangbah ka jylla u Conrad K Sangma hynne ka sngi ula lum ka jingialang bad bthah ia ki bor district ban peitngor ia ki jaka ba don marjan bad ka Assam na ka jingkhynra ka Assam ban pynher krad ia ki bar jylla.   “Ha ka jingialaang la iakren ka lah ban don ka jingktah na ka jingpynlong ka Assam ban kyndang naphang ia ki mynder ri bad ka sorkar Meghalaya ka la iakren bad ki DC ba ki dei ban iakren bad ki ophisar ha ki Block, pulit, VDP, ki sengbhalang bad ki khlieh nongsynshar ban pynthikna ba kam dei ban don kano kano ka jingwanrung tuh ki mynder ri shapoh ka jylla” la ong u Conrad Sangma.

U Myntri Rangbah ula ong, ki don katto katne ki District ba don hapdeng ka jingma namar ka jingdon ki shnong ha khappud ka jylla Assam bad khamtam ia ki shnong ba iajan bad ka Assam ban jingkyndang mynder ri. Ula ong ba ha ka jingialang kaba ula lum, la pyntip ba kam shym la don kano kano ka jingjia ha kano kano ka district bad baroh ki bor pyniaid pyniaid district, ki pulit, ki VDP, VLC bad ki khlieh nongsynshar, ki sengbhalang kila iatreilang ban pynthikna ba kino kino ki jingtip kiba ki ioh halor ka jingwan rung shapoh ka jylla dei ban pyntip mardor khnang ba yn shim mardor ia ki sienjam kiba tyngeh.

U Myntri Rangbah ula bthah ia ki district khamtam ia ki jaka kiba don marjan bad ka Assam ban long kiba husiar bad kiba peitngor bha. Ha kane ka jingialang la wan iashimbynta da u Additional Chief Secretary uba khmih ia ka kam pohiing, ka Director General of Police ka jylla, ki heh ophisar na ka tnad Political, Kam Pohiing, ki heh Pulit bad ki Deputy Commissioner na ki District bapher bapher.