Kop ka Deborah ban thaw thymmai ia ka Congress

Ka Working President ka MPCC ka Deborah Marak, ka la ong watla ka seng kam don shuh ki MLA, ka Congress kan thaw thymmai ia ka party ban pynkhlain bad kan leit biang sha ki paidbah ki ban ai ia ka rai.Ia kane ka Deborah ka la ong hadien ba uwei na ki nongialam ka Congress u bah Ronnie V Lyngdoh hynne ka sngi ula phet noh sha ka NPP. Haba kren sha ki lad pathai khubor, ka Deborah ka la kyntait ba ka Congress kan khang noh ia ka dukan sain pyrthei ha Meghalaya tang namar ba phet lut ki MLA sha ka NPP.“Ka Congress kan ym khang dukan ha Meghalaya bad ka la pynskhem ba ha Garo Hills ka party kala jop ha ka MP elekshon kaba dang shu dep khlem pyndonkam pisa shi naia ruh,” ka la ong.

Ha kajuh ka por, ka la kyntait ruh ba ka don ka jingtlot ha ka kam nongialam ha ka party hynrei ka la ong ba kiba phet na ka party, ka dei namar ba ki shah tan ha ka bor jong ka pisa. Ka la kam ba ki don bun ki nongialam kila kwah eh ban wan iasoh sha ka Congress bad kane kan sa jia shen. Ka Deborah ka la iathuh ba u bah Ronnie ula pyntip sha ka Congress ban mih noh hadien ka jingiasyllok bad ki paidbah ka Mylliem konstitwensi bad ki nongialam ka Mylliem Block Congress.

Ka la bynrap ba ka party kam don eiei ban ong ia ka rai jong u, hynrei ka jingleit iasoh jong u sha ka NPP ka shong ha u bad u tip khambha ma u bad katkum ka jingtip, u bah Ronnie u la iakren bad ka NPP la katto katne por mynshwa ba un rung.