La kyntiew kyrdan PHC ia ka Nongkynjang Sub Center, ai jingiaroh ia u MLA barim

Ka jingphoh sniew ba la slem bah jong ki paidbah ka Nongkynjang bad thain Lai Lyngdoh ka la kylla long ka jingshisha,  hadien ba la sakhi ba ka jingpyntrei ia ka Nongkynjang PHC kaba la kyntiew kyrdan na ka Sub Centre ka la iaid shaphrang mynta da kaba khmih lynti ruh ba shen yn sa lah ban pyndep bad plie noh ia ka.Kum ban shu kdew hangne ba ia u mawnongrim ban kyntiew kyrdan ia katei ka Sub Centre sha ka PHC la wan ban buh da u bah MacMillan Byrsat uba long u MLA ka Nongstoin ha katei ka por, kata ha ka 13 tarik u bnai Kyllalyngkot jong u snem 2023 bad na ka liang ka sorkar ka la ai jingmynjur bad mang tyngka ruh haduh 9.78 klur ban shna bad pynbit pynbiang ia katei ka PHC.

Halor kane ka bynta, ki paidbah jong ka thain Lai Lyngdoh khamtam ki longkmie ki la pynpaw ka jingsngewnguh kaba khraw ia ka sorkar bad khamtam eh ia u MLA barim ka Nongstoin, u Bah MacMillan Byrsat, uba la trei shitom ban pynurlong ïa kane ka jingangnud kaba la slem jong ki paidbah. Ki paidbah ki khmih lynti ba kane ka PHC kan long ka lad ban wanrah ia ki lad jingsumar ba khamjan sha ki paidbah khamtam kiba duk basuk bad ki kup shylliang sem shilliang.

Na ka liang ki longkmie ki khmih lynti ba kane ka jaka sumar kan iarap shibun eh ïa ki longkmie ba armet kiba donkam ban ioh jingsumar kyrkieh, khlem da hap ban leit sha ki hospital kiba jngai. Lah ban ong hangne ba ka jingioh ïa kane ka PHC ka dei ka jingjop kaba khraw na ka bynta ki paidbah ka thain Lai Lyngdoh bad ki shnong ba marjan ha kaba iadei bad ki lad ai jingsumar.