Yn ithuh shwa ia ki Kur Khasi Pnar, ki Hadem bad Biate hadien:CEM

Ha ka jingleit iakynduh ki nongialam ka Dorbar ki Waheh Kur Ri Jaiñtia ia u CEM ka JHADC u Thombor Shiwat ha ophis treikam jong u mynta ka sngi na ka bynta ban pynkynmaw iaka shithi kaba kila dep phah shaka ophis treikam jong u naduh u snem 2024 kata halor ban ithuh noh iaki jait Kur ba la dep phah kyrteng shaka council kiba hap hapoh u pud u sam ka jong ka, Naka liang u CEM u iathuh ba kila dep shong jingialang hapoh ka Customary Committee naka bynta ban bishar bniah iaki jait Kur bala wan buh kyrteng.

U iathuh ba jingshisha ka Council naduh u snem 2024 kala dep ai pynbna paidbah da kaba khot ia baroh ki jait kur ba don ha Rilum Jaiñtia ba kin wan pynrung noh iaka kyrteng ka seng Kur jong ki, ki nongialam seng Kur, kumjuh ruh ban phah iaka kyrteng ki kur ba kynthup hapoh ka seng Kur jong ki, khnang ban ithuh noh daka council, hynrei naka daw ba maki ruh kim lah ban wan buh biang por, kila pan por biang bad kane ruh dei ka daw ba slem. Kumta hadien ba la kut ka por pdiang ban wan pynrung kyrteng, lyngba ka Customary Committee kila shong jingialang bad bishar bniah bin pa bin.

Bad ha ka jingshong bishar u ong, iaki kur Khasi Pnar ba juh don ha Rilum Jaiñtia la mynjur ban pyniaid beit shakhmat katba naka bynta ki jait Kur Hadem, Biate pat namar ba don ki jait kur ba kim da shai bha bad bym pat juh iohsngew ruh ha Ri Jaiñtia kumta ki rai ban pynsahteng shwa, bad ban iaid shwa ruh ka jingtohkit bniah lada dei kiba lah ban pdiang ne em. Te kumba na ka liang ki nongialam ka Dorbar ki Waheh Kur Ri Jaiñtia kila kyrkieh da kaba kyntu ia u ban ithuh noh shwa tang ia kiba la pynrung kyrteng khang ban pynsuk ia u DC ha kaba ai schedule tribe, u CEM ula kular ban shu ai shwa daka jingthoh iaki kyrteng ki Kur bala dep bishar bad pdiang ka council wat lada kam pat long aiñ ruh.