Ba pyneh ka RR Colony Society, leit jurip u EM ia ki dukan ha Them Rynjah

Ka Khasi Hills Autonomous District Council (KHADC) haka jingïalam da u Executive Member (EM) In-charge ka Trade u Bah Winston Tony Lyngdoh ha ka jingdonlang ki nongialam ka shnong Them Rynjah ki la pynlong ka jing jurip ia ki Trading License hapoh ka thain. Kane ka jingleit jurip ka dei hadie ba ka KHADC ka la ioh jingioh ka jingujor na ki nongialam shnong ka Shnong Rynjah, halor ka jingbthah ka R&R Colony Society ba ki ba shong ha kane ka jaka kim donkam shuh ia ki kot ki sla na ki Dorbar Shnong Rynjah. Haba kren sha ki lad pathai khubor u EM In-charge ka Trade u Bah Winston Tony Lyngdoh ula ong ba jingwan mynta ka sngi ka long hadien ba ioh ka jingujor na ki rangbah shong kane ka thaiñ, ba ki don ki ba ong ba kim donkam shuh ia ki Dorbar Shnong na Rynjah ban ai NOC ia kiba sah hangne ha R&R colony.

“Kumta ngi la wan ban jurip ia kane ka jaka bad halor kane ka mat hi ka don hi ka jingiaid lait ha kaba iadei bad ka Court order kumta ngi dang bthah ia ka shnong bad ki ophiser ka District council ban bishar bniah biang ia ka order khang ba kum ka district council kan lah ban leh ia ka ba donkam halor kane” la ong u Bah Tony. “Ngi la leit ban jurip ruh halor ki kot ki sla kiba don dukan ha kane ka jaka bad namar ba ki dei ki nongshong dukan kiba la slem kumta ngi wan jurip ban peit la ki ju pynthymmai ne em ia ki Trading License jong ki” ula ong. U Bah Tony u la ong ba kumba la lap hi ki don na ki dukan kiba dei trai Khasi ki la ioh ia ki Trading License bad baroh hynrei kin hap ban ioh sa ka MOU pat na ki trai dukan ba ki ai kam ia kiba na bar Jylla bad lada kim pynbiang ia kane ruh ka Council kan sa shim da kawei ka sienjam.

“Kumta mynta ka sngi ngi la shim ka kyrteng ki bar jylla bad bthah ruh ia ki Enforcement ka Council ba kin lum ia baroh ki kyrteng ki barjylla ki ba shongdukan ha kane ka jaka khang ba kin lah ban pyntip halor ki kot ki sla ba ki bar jylla kin hap ban leh lada ki kwah ban leh kam khaii ha kane ka jaka” u la ong. U EM u la ong ruh ba nalor kane ka district council ka la pynskem ruh ia ka notification jong u snem 2019 kaba  la bthah ban ithuh noh ia kane ka jaka da ka Them Rynjah ym ka R&R colony.