Pluh ka Night Super ba tynrah ka thuk thuk, Ingkhong u nongñiah

Ha kawei ka jingjia ba sngewsih, u wei u samla u la khlad noh hashen hadien ka jingtyngkhuh bad bthei kynsan ka night super kaba dang kiew na Guwahati ban leit sha Silchar, kane ka jingjia ka la jia ha ka miet jong ka 24 tarik Nailur ha ka por 10:30 eiei ha Nongpoh pyrshah ka Nongpoh Civil Hospital. Katkum ka jingtip ba la iohlum, la iathuh, ba u tei u samla ba la khlad noh na ka jingpluh ding ka night super la tip kyrteng kum u Barista Mylliemngap (29) ba shong basah ha ka shnong Umsawkhwan, Ri Bhoi District.

La iathuh ruh, ba kane ka jingjia kem ding kaba shyrkhei jong katei ka night super bus kaba don ia u number AS 01 GC 3288 ka la jia hadien ba kawei ka thukthuk KTM kaba don ia u number ML 05 Y 3698 kaba la niah da u Samla Barista ka la leit ban tyngkhuh pyrshah ia katei ka bus hadien ba u la bakla ban iaid na ka liang ka bym dei (Wrong Side) bad tang mar ia tyngkhuh ka ding kaba shyrkhei ka la klang bad ban bam duh ia u tei u samla u ba la khlad hashen, ha kane ka jingjia ki nongleit nongwan kiba shong ha katei ka night super bus ki la lait thaw na ki jingjia ba sngewsih bad lait thaw na ki jingmynsaw.

Na ka liang ki bor pulit ka Nongpoh Police Station lem bad ki bor pulit ka Nongpoh Traffic Branch ha ryngkat ki pulit pynlip ding ki la poi mar mar ha katei ka jaka ban tem ia ka ding kaba la klang bha hynrei tad haduh ban da ioh pynlip ia ka ding u tei u samla u la khlad noh hashen bad la rah noh ia ka met jong u sha Nongpoh Civil Hospital ban pyndep ia ka jingtohkit.