Yn shimti u Bah Winston Tony kum u CEM thymmai ka KHADC

Ka Voice of the People Party (VPP) ha ka janmiet jong ka sngi Palei, ka la shim ia ka rai ban bynshet noh ia ka shuki Chief Executive Member (CEM) ba thymmai ka KHADC ha u MDC ka Nongthymmai u bah Winston Tony Lyngdoh, katba ia ka kawei ka shuki Executive Member (EM) yn pynmih bujli noh da u MDC ka Jaiaw- Mawprem u bah Denzil Chen.

Ia kane ka rai, ka VPP ka la shim ha ka jingialang ba long ha ophis treikam ka party ha kaba la wan iashim bynta da baroh ki MDC, ki MLA bad ki dkhot nongkitkam jong ka party.

Kum ban shu kdew ba u bah Shemborlang Rynjah ha ka sngi Balang ka 24 tarik Nailur, ula aiti noh ia ka shithi iehnoh kam kum u CEM, namar ka jingbym don hapdeng ka met kaba koit ba khiah.

U nongialam ka VPP u bah Ardent Miller Basaiawmoit haba kren sha ki lad pathai khubor, ula ong hadien ba u bah Shemborlang ula iehnoh ia ka shuki CEM, ka party ka la lum ia ka jingialang ban ia shong pyrkhat kumno ban pyniaid bad ban pyntyllun ia ka kam shakhmat.

“Hadien ka jingiakynduh jong baroh ki MDC, da kawei ka rai ngi la shim ba ngin jied ia u MDC ka Nongthymmai konstiwensi u bah Winston Tony Lyngdoh ba un shimti kum u CEM ba thymmai ha Council bad ia kawei ka shuki EM ba thylli, ka party da kawei ka jingmut ka la rai ban pynmih bujli da u bah MDC ka Jaiaw-Mawprem u bah Denzil Chen,” ong u President ka VPP.

Halor ka jingkylli ban thung sa ia u Deputy CEM, u bah Ardent u la ong ba kam don jingmut ban buh ia u Deputy CEM namar ba kan nym lah ban pynneh ia ka EC lada wan ka khep kum kane kaba u CEM u hiar shuki.

Ula bynrap, “Lada don tam sa lai ngut ruh kam don jingmut ka EC kan khyllem hi, bad kam don jingmut ban buh ia u Dy CEM namar ka jingdon jong u Dy CEM kan nym lah ban pynneh ia ka EC lada wan ka khep kum kane kaba u CEM u hiar shuki. Hap ban thaw da kawei ka EC.”

Haba kylli halor ka jingbate kam, u bah Ardent ula ong ba ia kane ka yn ieh ha ka jingstad jong u CEM ba thymmai kumno ban sam ban bate ia ki kam.

U bah Ardent ula pynpaw ka sngewtynnad ban iohi ia ka jingtreikam jong ka EC ha kine ki 5-6 bnai namar ba kam shym la shim ne leh kyrkieh ia kino kino ki kam ki rai hynrei ka da bishar da thew bha.

“Wat lada ngim kwah ban kob kum ka party, hynrei ka khubor ka kren shai ba naduh ba ka VPP ka ialam ia ka EC, ka la wan ka jingkhuid ha ka rukom treikam ha ka EC ha kaba ym don shuh kano kano ka jingtieng jong ki briew ban leit sha DC ba ioh hap siew pisa ia kane katai, bad ngi sngewtynnad ia ka jingpyrshang ka EC ban wanrah ia ka rukom thungkam thungjam da ka Recruitment Committee bad shen yn sa pyntyllun ia ki kam,” ong u nongialam ka VPP u bah Ardent.