Jurip u MDC ban shna surok na Lum Shillong bad iasoh ha Viewpoint sha Laitkor

U MDC ka Laban constituency u Bah Ricky Shullai hynne ka sngi ula lum ka jingialang bad ki nongialam shnong Riat Laban ha ka jingdonlang ki nongmihkhmat na ka Ophis KHADC, Hima Mylliem ban iakren halor ka jingthmu ban shna surok na lum Shillong ban mih pat sha View Point. Ha shuwa kane u MDC ula leit jurip ruh ia ka bynta jong ka jaka ban shna ia ka Surok thymmai ba heh kumba 500-600 meter. Haba kren sha ki lad pathai khubor u Bah Ricky ula ong, ba ka long kaba donkam ban ioh surok thymmai ka ban mih ha View Point Shillong Peak namar kane ka surok ka ailad iaki paidbah ban nym iaid shuh naka surok kaba hap haka haka shipai.

U Bah Ricky ula ong ba haduh mynta ki nongwan shangkai pyrthei bad ki paidbah ki hap ban iaid lyngba ka surok kaba hap haka jaka shipai ban poi sha View Point bad kane ka buh jingeh lada ki shipai ki khang surok naki daw ba bun khamtam lada don ki jingjia ba kyrkieh. Ula ong ba kane ka surok thymmai kan iarap ruh iaki trai shnong kiba don dukan ha shi lynter ka surok Lum Shillong haduh View Point namar kan kyntiew iaka ioh ka kot jong ki lyngba ka jingwan ki nongwan shangkai pyrthei (Tourist) sha kane ka jaka.

“Ka jingialang ka long kaba seisoh bad u Myntri ka Hima Mylliem ula mynjur ban ai iaka jaka ban shna surok thymmai bad shen un sa phah daka jingthoh shaka KHADC bad hadien bala ioh daka jingthoh naka KHADC ka Riat Laban Dorbar Pyllun ka iakren bad ka Sorkar ban mang tyngka ban shna noh daka surok thymmai” la ong u Bah Ricky. U MDC ula ong ba kane ka surok thymmai kan ai jingmyntoi iaki paidbah namar kan pyniasoh bad ki surok ban poi sha Laitkor bad Nongthymmai bad kan iarap ban weng iaka jingdheng kali iaki kali ba thmu hiar sha sor Shillong.