Ka KHADC kan ym ai ia ka surok Wahkaji-Nongtner ha ka PWD

U Executive Member (EM) ka Khasi Hills Autonomous District Council (KHADC) ba khmih ia ka tnat Council Assets u Bah Pynkhrawboklin Kharjahrin ula pyntip ba ka District Council ka kloi ban ai jingmynjur lane ka No Objection Certificate (NOC) sha ka Sorkar Jylla ban maramot ia ka surok na Wahkaji sha Nongtner South West Khasi Hills. Ia kane u Bah Pynkhrawboklin ula pyntip haba jubab ia ka jingkylli ba la wanrah da u MDC ka Ranikor u Bah Pius Marwein uba la pyntip ba ki paidbah na ki 11 tylli ki shnong ki kwah ka KHADC ka dei ban aiti noh ia ka surok Wahkaji sha Nongtner sha ka tnat Public Work Department (PWD) Road ka Sorkar Jylla khnang ban ioh maramot namar ia kane ka surok la shu ieh khlem da maramot mynta daki phew snem. U Bah Pius ula iathuh ba ka surok naduh Wahkaji lyngba Nongtner shaduh Mawthabah ka don 21 km bad ka iaid lyngba 11 tylli ki shnong kiba la mad jingeh mynta da ki phew snem namar ka jingsniew palat ka surok.

U la ong ba ki paidbah nong shong shnong naki 11 tylli ki shnong ki la kyrpad ia ka KHADC ban ai ti noh ia ka surok sha ka tnat PWD ka Sorkar Jylla namar ia ka surok Wahkaji lyngba Nongtner shaduh Mawthabah la shah kynthup haka PMGSY-IV. Haba jubab ia ka jingkylli u EM ula iathuh ba ha u snem 2006 ia ka surok Wahkaji shaduh Mawthabah ba don 21 km la bei tang da ka UCIL kaba kwah ban tih Uranium hynrei hadien ba kam ioh lad ban tih Uranium, ia kane ka surok ruh la shu ieh khlem maramot. U EM u la ong ba ka jingkyntait ka District Council ban ai ti noh ia ka surok Wahkaji sha Nongtner ka dei namar ba kane ka surok ka iaid lyngba ki shnong ba don uranium bad ka KHADC ka kwah hi ban iai long trai ia ka surok bad ia ka jaka ban pynskhem ia ka jingpyrshah tih Uranium.

“Ngi kloi ban ai NOC ia ka tnat PWD ka Sorkar Jylla lada ka kwah ban maramot ia ka surok hynrei ngim nym ai pat ia ka surok namar ngi kwah ban bteng long trai hi ia ka surok bad jaka” la ong u Bah Pynkhrawboklin. Haba bteng ban buh jingkylli u MDC ka Ranikor ula ong “Nga kyntu ia u EM bad ia ka EC ban leit jurip ia ka surok bad sngap ia ka sur jong ki paidbah kiba iai mad jingeh namar ka jingsniew palat ka surok Wahkaji-Nongtnger”. Na ka liang u EM haba jubab ula ong “Ka District Council kam don pisa ban maramot” bad la bynrap da ka ba ong “Ngi kloi ban ai NOC lada ka Sorkar Jylla ka kwah ban maramot”.