Kem ki pulit ïa u rangbah ba kynshleiñkynthei, kurup ïa ka Bolero

Ki pulit ha ka sngi Saitjain ki la iohkem noh ia uwei u briew uba la suba ba uleh kynshlein ia ki khynnah kynthei ha ka thain Laitumkhrah. Ia une u briew ba la tip kyrteng kum u Tamdorlang Risaw (42 snem) na ka shnong Nongrah Block II, Shillong, ki pulit ki la kem na kawei ka shnong ba tip da ka Tawang ha Mawsynram, ha kaba la ioh ban kem da u Officer-in-Charge, Mawsynram Police Station bad ka kynhun bad ka ioh kurup noh ruh ia ka kali Bolero ba la pynkylla dur. Katkum ka tyllong khubor na ki pulit ia utei u briew yn sa rah noh sha iing Kashari na bynta ban pynlong ia ka jingtian bishar. Ki pulit ki la iohkem ia utei u briew hadien ba ki la pyllong ia ka jingkhynra bad da ka jingiatreilang jong baroh ki police station ha East Khasi Hills, la ioh kem ia tei u briew bad la ioh ruh ban kurup ia ka kali jong u.

Katkum ka jingpyntip na u Superintendent of Police ka East Khasi Hills, u Bah Vivek Syiem, ki pulit ka Laitumkhrah Police Station ha ka 15 tarik Risaw, 2025, ki la ioh pdiang ia artylli ki jingujor ejahar na arngut ki briew, kiba la ujor ba ki la shah leh kynshlein bad shah buddien ha ki jaka paidbah ha uwei u briew ba niah ia ka kali Bolero kaba don ia u number Laitumkhrah ML05P 7884. Kham mynshwa la ioh jingtip ba ha u Jymmang, 2025 ha kaba katei kajuh ka kali la ong ba la iohi ha ki thain Don Bosco Square, Shillong. Ha katei ka por ruh u briew ba niah ïa katei ka kali u la leh kynshlein bad khlem akor hakhmat paidbah ba don ha kitei ki bynta.

Katkum ka ejahar ba la ujor sha ki pulit, la ong ba ha ka 17 tarik Nailur ha ka surok Dhankheti-Malki, katei kajuh ka kali la iohi ba ka leh ia ki kam kynshlein, ba kynthup ka jingleh khlem rain bad pynlehrain paidbah. U SP u la pyntip ruh ba ka jingjia ba dang shen ka dei ha ka 13 tarik Risaw 2025 ha ka por kumba 5:20 janmiet, hajan Loreto Convent, Shillong. Ka nongujor ka la pyntip ba katba ka dang ap Rapido, katei kajuh ka Bolero ka la leit pynwit ha kaba u nongniah u la sangeh ia ka kali hakhmat jong ka khynnah bad pynhap ia ka iit kali, ha kaba u la leh ia ki kam kynshlein, ha kaba u la buddien ruh ia katei ka khynnah bad khang lynti ruh ia ka.