Shah jied saw ngut ki samla ban trei ha IndiGo Airline na ka ‘Recruitment Drive’ ha Don Bosco Youth Centre, Shillong

Ka IndiGo Airline ka konpani pyniaid liengsuin ba heh tam ha ri India ha ryngkat bad ka Don Bosco Youth Centre ka la pynlong da Campus Recruitment Drive (Walk-in Interview) na ka bynta ka jingjied ïa ki ‘Cabin Crew’ lyngba ka jingïatreilang bad ka Emporium Skills Training Institute (ESTI) ha ka Training Centre ha Don Bosco Youth Centre (DBYC), Laitumkhrah, Shillong. Ha kane ka jingjied ia ki nongtrei ka Cabin Crew, kumba 700 ngut ki kyrtong na kylleng ka thain North East India ki la thep kyrteng ha ka online registration bad na kine, 242 ngut ki la wan shim bynta ha ka interview. Hadien ka jingbishar bniah saw ngut ki la shah jied ban rung ha kane ka kam. Kane ka lad plie kam ka dei ka sien ba nyngkong eh ba ka Don Bosco Youth Centre, Shillong, ka shlem ai jinghikai ba paw ha jylla ka la ioh ban pynlong ia kane ka Walk-in Interview da ka jingïatreilang jong ka Airline ba pawnam ha ka ri. Ka Centre ka la bteng ruh ban trei na ka bynta ka jingkyntiew ïa ki samla lyngba ka jingsam sewing machine ban ai lad ïa ki ban sengkam la jong.

Ha u bnai Nailur 2025, ka ESTI bad ka Don Bosco Youth Centre, Shillong ki la soi ïa ka Memorandum of Understanding (MoU) ban ïatreilang ban ai jinghikai ban plie lad ban pynioh jingtrei kam ha ka Aviation, Hospitality bad Luxury International Cruise Lines. Kane ka jingïatreilang ka dei ka thong ban kyntiew ïa ki samla bym ioh kam ban rung ha ki kam ba bapher bapher. Kane ka Cabin Crew Recruitment Drive ka dei ka sien nyngkong hadien ka jingsoi ïa ka MoU, bad la khmih lynti ba kin don shuh shuh ki lad jingpynrung kam na ki company na India bad ruh na kiwei ki ri bapher bapher ha ki bnai ban wan. Ka ESTI kan iai bteng ban ai jinghikai bad jingpynkhreh ïa ki samla ha Don Bosco Youth Centre, Shillong, ban pynkhreh na bynta ban kam trei ia palat 20 tylli ki ri ha kylleng ka pyrthei. Haba kren sha ki nongthoh khubor, u Fr. Michael Makri, SDB, Director ka Don Bosco Youth Centre, Shillong, u la pynpaw ka jingsngewkmen bad ka jingangnud shuh jong u ban iarap ïa ki samla:

“Ka long kaba sngewsih ban tip ba kumba 700 ngut ki kyrtong ki la pynrung kyrteng hynrei tang saw ngut ki la shah jied. Bun na ki samla khamtam na Meghalaya kim dap ïa ka jingrynieng kaba donkam, katba kiwei pat ki shem jingeh ha ka koit ka khiah bad ka jingïakren khamtam ha ka ktien Hindi. Nga kyntu ïa kiba ym shym la shah jied ha kane ka sien ba kin wan ban pynkhreh bha ïa lade ha Don Bosco Youth Centre ban pyntbit ia lade ka sien ba bud.”U Fr. Makri u la ai ruh ka jingsngewnguh ba kyrpang ïa ka IndiGo Airlines bad ka Emporium Skills Training Institute (ESTI) halor ka jingïatreilang bad ka jingkyrshan ban pynioh kam ïa ki samla ka Meghalaya bad ka North East hi baroh kawei.