Plie u Conrad ia ka Police Station ba thymmai ha Jengjal

U Myntri Rangbah ka Jylla u Conrad K. Sangma hynne ka sngi ula plie ia ka Police Station thymmai ha West Garo Hills ba la tip kum ka Jengjal Police Station ha ka jingdonlang ka Kong Idashisha Nongrang (IPS) Director General of Police, u J.F.K. Marak u Deputy Inspector General of Police (Western Range), u Vibhor Agarwal Deputy Commissioner West Garo Hills, u James K. Sangma u Chairman ka MIDC, u Abraham T. Sangma u Superintendent of Police West Garo Hills, ki heh pulit bad ki ophisar bad ki nongshong shnong.

Haba kren ha ka jingialang u Myntri Rangbah ula ong, ka Jengjal Police Station ka dei kawei na ki police station ba biang tam ha jylla namar ka don ha jaka pdeng bad kan iarap ban pynsuk ia ki paidbah bad kumjuh ia ki pulit ban ai shakri bad ula pynpaw ka jingsngewnguh ia u Nokma bad ia ki paidbah ka thain kiba la ai sngewbha ka jaka ban tei ia kane ka Police Station. “Ia kane ka police station la tei katkum ki ki kyndon jong ka sorkar India bad ngin pynthikna ba baroh ki police station ba don ha kylleng ka jylla kin shna thymmai katkum ki kyndon na bynta ka jingbit jingbiang ki pulit,” ula ong.

Ula pyntip mynshuwa ban pynbha ia ki police station shitom bad kyllain namar ki police station ki donkam ban ioh mang tyngka na ka sorkar jylla wat na bynta ki kam ba rit kum ban ai rong. “Mynta na ka Police Infrastructure Renovation Fund, ki SP ki lah ban maramot ia ki police station bad kim donkam ban ap ia ka mang tyngka ka sorkar Jylla” ula ong bad bynrap na ka Police Infrastructure Renovation Fund bun tylli ki police station la dep shna pynbha. U Myntri Rangbah ula pyntip ki kam ba lait palat 3000 tylli ha ka tnad pulit ki la iaid shakhmat ban thungkam bad kaba sah ka personal interview. Kane lehse kan long ka jingpynrung kam pulit bah eh tam ha ka histori ka jylla bad lyngba kane ka jingthungkam yn lah ban pynbeit ia ka jingduna ki pulit.