Palat 10 hajar, kynthup 500 ngut ki khynnah ba ioh jingpang HIV

Ka Meghalaya ka la kynjoh ia palat 10,000 tylli ki case jong ki briew kiba don ia ka jing pang HIV/AIDS ba kynthup ia 500 ngut ki Khynnah. Ia kane la pyntip da ka Project Director jong ka Meghalaya AIDS Control Society (MACS) ka Dr KL Iawbor, Project Director ka Meghalaya AIDS Control Society (MACS). Haba kren sha ki lad pathai khubor ka Dr Iawbor ka la ong, “Ki don palat 10,000 ngut ki briew la test positive ia ka HIV/AIDS ha Meghalaya kynthup kumba 500 ngut ki khynnah”. Ka Dr Iawbor ka la iathuh ba ka East Jaintia Hills ka dei kaba bun eh ki nongpang HIV/AIDS, ha kaba bun na ki khynnah ba ngat ki dei kiba wan na ki longiing ba duk. “Ka daw ba hakhmat eh halor ka jingsaphriang ka jingpang ka dei namar ka jingiashongkha khlem ki jingiada bad bun ki briew kim shym la wan shakhmat ban leh test” ong ka Dr Iawbor.

Haba pynbna ba ka Jylla ka la pynkhreh bha ban rakhe ia ka World AIDS Day ha ka 1 tarik Nohprah, ka Dr Iawbor ka la ban jur ia ka jingdonkam ban iashim lang ia ki jingkitkhlieh ban tehlakam ia ka jingsaphriang ka jingpang HIV/AIDS. “Une u khniang jingpang u dei uba ma bha bad ka dei ka kamram jong iwei pa iwei na ngi ban pynsangeh ia ka jingiabit khnang ba ngin lah ban pynlong ia ka Jylla bad ka Ri kaba lait na ka HIV hapoh u 2023” ka la ong. Ka MACS ka la pynlong ki rynsan ialap bad ki prokram ban leh test ha kaba ka la screen ia 6882 ngut ki briew bad shem ba 24 ngut ki dei ki HIV positive.“Haduh 87% na ki case la shem na ki outreach program ba la pynlong sha ki jaka ba don jingma bad ki riew paidbah” ong ka Dr Iawbor haba bynrap “Don na ki, kiba la wan hi dalade bad don pat kiba phah da kiwei halor ka jingsuba ba ki lah ban don ia une u khniang jingpang”.

Ka MACS ka la pynkhreh ban pynlong ia ka bike rally bad kiwei ki prokram ha ka 1 tarik Nohprah ha kaba u Myntri Rangbah ka Jylla Conrad K Sangma un long u kongsan ban pynphriang ia ki jingtip bad jingkyrshan ia kito ki briew kiba im bad u khniang HIV/AIDS. Ki Myntri Sorkar bad baroh ki MLA ka East Khasi Hills nalor ki skul jong ki nos bad kiwei kiwei lem bad ki briew ba don ia ka jingpang HIV kin ia donlang ha kane ka prokram.