Plie u Dy. CM ïa ki Light ban pynitynnad ha u Lumtiniang

Ha ka miet jongka 4 tarik u Nohprah, 2025 u symbud myntri ryngbah duh ka sorkar jylla u Sñiawbhalang Dhar ula leit sha u Lumtiniang Park ha shnong Mowtyrshiah West Jaiñtia Hills District ban plie paidbah iaki Light bala pynriam itynnad ha une u lum uba long ruh u lum ba ki paidbah ki smgewtynnad ban leit kai pyngngad. Ha kane ka miet plie paidbah la donlang u MLA ka thaiñ u Nujorki Sungoh, ki MDC ka JHADC ba kynthup u Bisonroy Iano bad u Wormanship Shadap, u Dolloi ka Elaka Raliang u Chawas Lyngdoh ki nongialam shnong Mowtyrshiah bad ki marjan shnong  nalor ki paidbah ba bun ba wan sakhi ia kane ka jingplie paidbah. U Nujorki Sungoh kum u MLA ka thaiñ haba iaroh iaka jingiaid lynti ka shnong Mowtyrshiah ban pynkhreh ia kane ka  pynriam light da kaba wanrah iaki buit bapher bapher, ula pynsngew ruh iaka jingiaid lynti jong u halor kumno ban kyntiew ia kane ka jaka jngohkai kaba long kawei ba  ki paidbah ki smgewtynnad ban  wan kai  pyngngad khnang ba kan nangkhring shuh shuh iaki nongjngoh kai.

Ha kajuh ka por u kyntu ruh ia u Sñiawbhalang Dhar Dy CM ban iatreilang da ka ban iarap buddien pynioh iaki skhim ba kila dep pan jingiarap ha kane ka jaka. Naka liang u Sñiawbhalang Dhar haba kren u ong, shisien bala don iaka thong ban kyntiew iaka kam jngohkai haka shnong ka thaiñ nyngkong hi dei ban long kiba biang ka  rukom pynwandur ialade haduh haka imlang sahlang, kynthup ka jingkhuid ban sdang shwa nala ki jong ki ïing ki sem, ban pyni iaka  jingkylluid mynsiem  haba iakren  khana bad ki nongwan jngohkai. Namar lymda  don ia kane ka mynsiem kam don jingmut ban wanrah ki jingtei jingshna  ba iadei bad ka kam jngohkai. Sa kawei ruh u ong, haba kwah ban kyntiew iaka kam jngohkai dei ban long kiba iohi jngai ymdei ban long palat kiba pyrkhing ne kiba ai  laitlan, hynrei ban sngewthuh ha kata ka rukom ban iabiang lang da kaba  tip kumno ban pynwandur.

Haka jingiadei bad ka jingdawa ka shnong ban pynkiew shuh shuh ia kane ka jaka u Sñiawbhalang Dhar u ong kumba long mynta ym pat lah ong ei ei namar haka jingiadei bad ka tourism naka liang ka sorkar kala rai ban shong pyrkhat shwa ban peit bniah iaki jingdonkam ba dei ban leh haki jaka bapher bapher katkum ki jingdawa ki jaka, namar lada bakla shim rai ki jingshna kin shu sepei kumba la don ki jaka ba ka sorkar kala pynlut daki klur hynrei kim long pat kiba ai jingmyntoi. Haka jingialang ba pyniaid  da u Tbn H.Lapasam la ruh ka jingkren na u waheh shnong Mowtyrshiah u Golden Change Dkhar bad kiwei.