Pluh ka iing ha Mawlai Nonglum, poi sngewlem u Bah PT Sawkmie

Ka jingjia kaba sngewsih ka la jia ha kaba kawei ka iing kaba don ha Mawlai Nonglum ka la pluh ha ka Lah sngi U Blei ka 22 tarik u Nohprah bad mar ia tip u MLA barim ka Mawlai u Bah PT Sawkmie u la poi sngewlem ban iakynduh ia kiba sah wai ha kane ka iing ba la pluh. Kane ka dei ka iing jong ka kong Ibadalin Rangslang ba shongwai da ka kong Kyntiew riti Sawkmie bad Beautilin Sawkmie. Haba ia kynduh ia kine ki longkmie u Bah Sawkmie u la kular ba ha ka sngi Hatmajai ka 23 tarik u Nohprah un sa ai ia ka jingiarap ha i bor barit jong u kum u MLA barim, khnang ba kin ioh thied ia ki tiar kiba ki donkam kyrkieh.

U la pynpaw ruh ia ka jingsngewlem sha kine ki longiing kiba tynna ruh ki dei ki kur ki jait jong u hi, ki jait Sawkmie. Katkum ka khubor, la ioh jingtip ba kane ka iing ka pluh kumba 12:30 eiei mynsngi bad khyndiat ruh ki mar ki khlem ioh sei shuh, hynrei la ioh sei tang kawei ka tyndong lyer ne cylinder gas, katba kawei ka la bthei ha ka por ba pluh. Hynrei kaba sngewkmen pat ka long ba ym shym la don ba iap ne mynsaw na kane ka jingpluh iing. La ioh jingtip ruh ba ka kali pynlip um ka la poi biang por, hynrei khlem lah shuh ban tem pat ia ka ding.

Ki paramarjan bad kiba iohi ia ka jingpluh ki la ia pyrshang ban ia tem lang ban pynlip ia ka ding, hynrei ym shym la lah shuh na ka jingjur ka jingklang ka ding. Ka la don ruh kawei ka kali kit um kaba kit na ka bynta kiwei, haba lap ia ka jingpluh ka la iarap synreit lem.