Tuid da ki hajar sha ka Meghalaya Revival & Healing Festival

Da ki hajar ngut ki paidbah riewngeit na kylleng ki jaka ki la tuid ha ka jingiaseng Meghalaya Revival & Healing Festival ba sdang mynta ka sngi ha madan Dieng Jabini, Bhoirymbong ban sngap ia ka khubor jong u Blei lyngba u shakri Apostle Ankit Sajwan.Ha kane ka jingiaseng u Apostle Ankit ula kren halor katno ka jingieid u Blei ia ka Pyrthei ha kaba ula phah bad aiti ia la u khun ba marwei u Jisu Khrist ban wan pynim ei ia iwei pa iwei.Ula ong bun ki khristan mynta kim sngewthuh ia kaei ka jingmut ban long khristan namar bun ki pyrkhat ba ka dei tang na ka niam hynrei ha ka jingshisha u Jisu ula wan ban pyllait bad pynim ia ngi.Ula iathuh ruh khyndiat halor kumno ka jingshem jong u ia u Blei,

“La kha ia nga ha ka niam Hindu bad ha ka por ba nga don 16 snem nga la ioh pang ia ka jingpang bym lah pynkoit hynrei hadien kane nga la iakynduh ia u Jisu bad ula pyllait im ia nga na ka jingpang bad nga la ioh mad ia ka jingpynim mynta.” Kane ka dei ka daw ba khraw balei u Jisu u wan bad pynim ia ngi namar ba u ieit katta katta ia ka pyrthei.U la kdew ia ki kyntien na ka Bible da kaba pynkynmaw, “U Blei u ong, nga la ieit ia phi da ka jingieit kaba bymjukut.”

Ha ka jingiaseng ula ai mynsiem ia ki riewngeit ba watla ngi ieng ban kyllon bun sien, hynrei ka jingieit u Blei kam ju kylla bad kan neh beit kumjuh.Ia kane ka jingiaseng kaba saw sngi kynthih, la pyniaid da ka kynhun jong ka Gatekeepers Meghalaya Chapter bad kan kut haduh ka 30 tarik u Kyllalyngkot, 2026.