La pynkhreh ban pyntreikam ïa ka SIR : CEO BDR Tiwari

U Chief Electoral Officer (CEO) ka Meghalaya u BDR Tiwari hynne ka sngi ula pyntip ba ka tnad ilekshon ka jylla Meghalaya, ka la pynkhreh shaid shaid ban pyntreikam ia ka Special intensive Revision (SIR) ha ka jylla,
Haba kren sha ki lad pathai khubor, u Tiwari ula ong ba ka tnad ilekshon ka jylla ka la pynkhreh ia ki jingdonkam baroh bad kaba sah mynta ka long sa tang ka jingap ban ioh ia ka jingbthah na ka Election Commission of India (ECI) ban sdang noh ia kane.
Katkum ka jingiathuh u CEO, ka jingpynkhreh ka la iaid shaid shaid ha kaba 12 tylli ki jylla ha ka ri, kila pyntreikam ia ka SIR bad ka jylla Meghalaya ka dang ap ia ka pali ban ioh ia ka jingbthah na ka ECI.
“ Ngi la pynkhreh ban pyntreikam ia ka SIR bad ki BLO ki leit rung ha man ki thliew iing ban pynshisha ia ka jingpynrung kyrteng ha ka thup thep vote. Kane kan wanrah ia ka jingkhuid ha ka thup kyrteng thep vote,” ong u CEO.
Dang shen, ki sengbhalang ha ka jylla bad ki seng sain pyrthei kila kyntu ia ka sorkar jylla ban pyntreikam noh ia ka SIR ha ki jaka kiba suba jur ba don ki briew kiba shu wan naei naei bad kiba ioh rung kum ki nongthep vote ha ka jylla.
Lah ban kdew ba da ki phew lak ngut ki briew kiba shu wan na Bangladesh ki bym dei ki nongshong shnong ka ri India, kila shah kyntait bad shah weng na ka thup kum ki nongthep vote ha jylla Bihar dang shen lyngba ka jingpyntreikam ka ECI ia ka SIR.