Ïaid paidbah ki khynnah pule halor ka jingma ka shongkha khynnah

Ban bteng ïa ka jingïaleh bad ban pynsngewthuh paidbah ïa ka jingma jong ka shongkha khynnah hapdeng ki samla pule, ka Ophis jong ka District Legal Services Authority (DLSA), West Khasi Hills District, mynta ka sngi ka la pynlong ïa ka jingiaid Rally jong ki khynnah skul bad ka Programme ai jingtip shaphang ka ain̈ ha ka jingialang ba la pynlong ha Anderson Higher Secondary School, Nongstoin.Ïa katei ka program la sdang da ka rally jong ki samla pule naduh phyllaw ka Anderson Higher Secondary School shaduh iew Nongstoin ha kaba ki samla pule ki la rah ïa ki placard ban phah ïa kima khubor kaba tyngeh pyrshah ïa ka shongkha khlem pat dei por bad ban pynsngew ïa ka jingdonkam jong ka pule puthi.

Ïa kane ka rally la plie paidbah da Ka Kong D.M.K. S. Shadap, Chief Judicial Magistrate, kaba la ai ruh ïa ki jinghikai bad jingpynsngewthuh ïa ki samla pule shaphang ka jingthmu bad ka jingdonkam jong kane ka rally.Hadien ka rally, la pynlong ïa ka Programme ai jingtip shaphang ka ain̈ ha  jingïalang ba la pynlong ha Hall jong katei ka skul. U Bah G.J.S. Marngar, ALADC, u la ai ïa ka jingkren shaphang ka Protection of Children from Sexual Offences (POCSO) Act, 2012, da kaba pynpaw ïa ki lad jingïada kiba don na ka bynta ka jingïada ïa ki khynnah.Ka Kong Myrthong, ALADC, ka la kren shaphang ka Prohibition of Child Marriage Act, da kaba ban jur ïa ka jingdonkam jong ka pule puthi bad kyntu ïa ki samla pule ban kiar na ki jingïadei samla bad ban pynleit jingmut pura ha ka pule puthi. Ka la pynpaw ruh ba ka shongkha khynnah ka ktah jur ïa ka lawei jong ki khynnah bad ka long kaba la khang pyrshah katkum ka ain. Ka la ong ruh ba kano kano ka jingïashongkha ne jingïadei bad ki khynnah hapoh ka rta 18 snem na ka bynta ki khynnah kynthei bad 21 snem na ka bynta ki khynnah shynrang ka long kaba be-aiñ.

Shuh shuh ha katei ka sngi, la ioh ruh ia ka jingkren na ka ophis jong u District Child Protection Officer (DCPO) uba la ai ïa ka jingpynsngewthuh shaphang ka Mission Vatsalya, kawei ka skhim jong ka Sorkar India kaba thmu ban pynkhlaiñ ïa ki jingshakri, jingïada ïa ki khynnah bad ban pynthikna ïa ka jingïada, ka jingïarap bad ka jingsuk jong ki khynnah, khamtam ïa kito kiba donkam jingïarap bad jingïada kyrpang. Ka programme ka la kut da ka jingïashim bynta shitrhem jong ki samla pule, da kaba pynskhem ïa ka khubor ba ka jingnang jingtip bad ka pule puthi ki long kiba donkam eh ban tehlakam ïa ka shongkha khynnah bad ban pynthikna ïa ka lawei kaba bha ïa ki khynnah.