Pynïoh jaka, ngan mang pisa ban shna noh ïa ka surok, kular u Bah Prestone ïa ka Shnong Amkoi

U Symbud Myntri Rangbah ka Jylla u Bah Prestone Tynsong hynne ka sngi, ula ong, ba ka Shnong Amkoi kadei kaba la pawnam hynrei kam biang kadei sa tang ka surok bad ula kyrpad ia ki trai jaka ba kin ai jaka na ka bynta ban shna ia ka surok ban kyntiew ia kane ka thaiñ kaba khring ia ki nongjngohkai na kylleng ki ri.
U Bah Prestone ula kren ia katei hynne ka sngi ha ka jingpynlong ia ka Shad Tynrai “Rongkusi” da ka Dorbar Shnong Amkoi ha Madan Amkoi, Amlarem Sub Division, West Jaintia Hills.
“Ka sorkar ka ialeh katba lah ban thaw ia ki lad ki lynti, ba ha ki jaka kiba kham itynnad, ngin pynbit pynbiang khnang ba ki nongjngohkai pyrthei na kylleng sawdong kin lah ban wan sha ki jaka ki jong ngi bad khamtam ia ki thain Riwar ki jong ngi. Ka wah kaba don ha kane ka shnong ka jong phi kadei kaba pawnam ym tang hangne hynrei ha ka pyrthei hi baroh kawei bad lashai ynda lah dep shna ia ka surok na Shillong haduh Tamabil, nga kyrmen skhem ba ki nongjngohkai kin tuid na kylleng sawdong ban wan sha kane ka jaka” la ong u Bah Prestone.
Ula ong, ka long kaba donkam ban don ia ki jingtei bad khamtam ia ki surok ban suk ka leit ka wan bad ula ong, “Ngin ia trei shitom ban kyrpad kyrpon ia ki trai jaka ba kin ai jaka bad lada ioh, nga nud ban kular lypa mynta ba ngin ai ia ka bhah tyngka na ka bynta kane ka surok. Kumta kan sa shong sa tang ha ki bor shnong bad nga kyrpad rit ruh ia ki trai jaka sngewbha ai jaka ia ngi. Lada phi ai jaka kam dei eh ba phin duh ia ka thung ka tep hynrei pyrkhat ia kiba shadien ba lada ki ioh surok ka jingmytnoi kaba khraw ia kane ka jaka ka jong phi”.
U Bah Prestone ula ong, ba ka tnad Jngohkai ka don ia ka thong ban kyntiew ia ki jaka kiba bit ba biang kum ka pliangja ia ki khun ki ksiew bad ia ka pateng ban dang wan.
Ula ai khublei ruh ia ka Dorbar Shnong Amkoi kaba la pynlong ia ka “Rongkusi” bad u ngeit skhem ba kin iai bteng ban pynneh pynsah ia kane ka shad tynrai jong ka jaidbynriew.
Ha kane ka jingialang la iadonlang u Myntri ka Pule Puthi u Bah Lahkmen Rymbui uba long ruh u MLA ka thain, u MLA barim u Bah Stephenson Mukhim, ki nongialam shnong bad ki paitbah kane ka thain.