Thaw history ka sorkar MDA, sam shithi thungkam jan 3 hajar ngut ki pulit

U Myntri Rangbah ka jylla u Conrad K Sangma bad u Symbud Myntri Rangbah ba peit ia ka kam pohiing u Bah Prestone Tynsong hynne ka sngi, ki la sam shithi thungkam ne ‘Appointment Letter’ sha ki 2968 ngut ki samla ha ka kam pulit ha ka jingialang ha 2nd MLP Battalion ban thaw history ia ka sorkar MDA ia ka jingthung kam ba heh duh ha ka jylla.

Kane ka jingpynrung kam thymmai ka long ban pyndap ia ki 2,968 tylli ki kam kiba lait thylli ha ka kam pulit ha ka jylla bad kaba bun tam ka jingthungkam kadei ha ka Armed Branch Constables kaba long 1494 tylli, 720 tylli ha ka Unarmed Branch Constables, 205 tylli ha ka MPRO Operators bad 195 tylli kum ki Firemen bad kiba tam ka dei ha ka liang ka UBSI, Driver Fireman, Driver Constable, Operator bad Mechanic.

U Myntri Rangbah ula ong, ba kane ka jingialang kadei kaban sah jingkynmaw ha ka histori jong ka jylla bad kane ka lah ban dei kaba heh tam ka jingsam ia ki shithi thungkam kaba ula iohi ha ki snem bad lehse ha ka histori jong ka jylla bad kum ka sorkar ka dap da ka jingsngew sarong ia kane ka khyllipmat.

Ula ong ba kane ka jingpynrung kam kala long kaba jwat bha namar kila don haduh 1.7 lak ngut kiba la aplai, ia kaba la donkam ban shimkhia thikna da ki bor khmih ia kane ka kam.

“Palat 1,70,000 ngut ki samla kila aplai na ka bynta ki kam ha ki kyrdan bapher bapher bad mynta kaba jan kumba 3,000 ngut ki riewshimet kin ioh pdiang ia ki shithi thungkam bad rung ha ka kam pulit bad ula iaroh ia ka Central Recruitment Board bad ia ka Tnad Home (Police) halor ka jinglah ban pyndep ia kane ka kam kaba la long kaba seisoh.

U Myntri Rangbah ula ong, ba ka kamram jong ki pulit ka long kaba kongsan bha namar khlem ka jingdon ia ka shongsuk shongsain yn ym lah satia ban jam shaphrang bad kan ym don ruh ka roi ka par bad ula kyntu ia ki samla kiba la rungkam thymmai ba ki don ia ka bynta kaba khraw ha kaban pynthikna ban pynneh ia ka shongsuk bad ban ai ka jingshngain ia ki paidbah ka jylla.

“Shen phin sa phong ia ka uniphom hynrei phi dei ban kynmaw ba kane ka uniphom kam dei tang ka riam. Haba ki briew ki iohi ia ka uniphom, ki dei ban ioh ia ka burom, jingskhem jingmut bad ka jingshaniah. Kidei ban tip ba u briew uba phong ia ka, ka ieng na ka bynta ka jingdon ia ka akor, ka jingbym leh shilliang khmat bad ka jingai ia ka bishar kaba hok” la ong u Conrad.

Katba u Bah Prestone Tynsong ula ai khublei ia kine kiba la shah pynrung kam bad ula banjur ia ka rukom treikam kaba khuid kaba suba ha kaba iadei bad ki kam ki jam jong ka jingpynrung kam bad ki samla kila ioh ia ka kyrdan dei lyngba ka jingtrei shitom ka jongki.

“Naduh mynta ka sngi, ka jingkitkhlieh ka jong phi kala sdang. Ai ia kaba bha tam ha ka jingioh jinghikai ne Training bad ha ka kam kaba phi trei bad ban iai kynmaw ia la ka kamram ban shakri ia ki paitbah ka jylla Meghalaya da ka jingkitkhlieh bad da ka jingsngewrit” la ong u Bah Prestone.

Ha kane ka jingialang la ioh ruh ia ka jingkren na ka Director General of Police (DGP) ka Kong Idashisha Nongrang ha kaba la iadonlang ki heh ophisar sorkar, ki heh pulit ka jylla, ki bahaiing bahasem jong kine ki samla kiba la rung thymmai ha ka kam pulit bad la pynkup burom ruh ia ki dkhot jong ka Central Recruitment.