Ka mat ba hakhmat ka long ban kyntiew ia ka pule puthi, ong MLA Ranikor

U MLA ka Ranikor, Bah Pius Marwein ha ka Sngi Palei u la plie paitbah ia ka iingskul ba thymmai jong jong ka Pyndengsohsham Govt. L.P. School hapoh Ranikor Block, South West Khasi Hills District ba la tei lyngba ka School Infrastructure Upgradation Project hapoh ka State Scheme ha ka jinglut kaba Rs.44,79,448/- (Sawphew saw lak hynniew phew khyndai hajar saw spah sawphew phra).

Haba kren ha kane ka sngi, u bah Pius u la ong, “Hadien ba nga la shah jied kum u MLA, ka jingnang jingstad kadei ka mat kaba nga buh hakhmat eh bad nga la buh thong ban trei shitom ban kyntiew ia ka pule puthi hapoh Ranikor constituency. Ym don kaei kaei kaba kham kongsan ia ki khun ki kti jong ngi ban ia ka jingnang jingstad, ka kham kongsan ban ia ka spah namar khlem ka jingnang jingstad, ka long kaba eh haduh katta katta ban pyniaid ia kata ka spah bad ban nang kiew shaphrang”.

U bah Pius u la ong ruh ba mynshwa u la sngewrem haba u tip ba ka sorkar ka don ia ka skul sorkar ha kane ka shnong, hynrei ki khynnah skul bad ki nonghikai jong kane ka skul kim lah ban wan skul ha ka por lyiur namar ka jingjot jingpeit jong ka iing skul. U la ong ruh ba u la bteng ban buddien ia kane ka kam bad ai khublei ia ka sorkar MDA kaba la shim khia bha ia ka pule puthi bad sdang ia ki projek ban pynbha ia ki iingskul sorkar bad ban pynbeit wat ia ka tulop jong ki nonghikai.

U Bah Pius u la kyntu ruh ïa ki nonghikai bad kumjuh ruh ïa ki nongïalam shnong ba kin ïakynduh ne pyntip mar mar sha u lada ki don kano kano ka jingeh ha kaba ïadei bad ki iingskul sorkar namar kum u MLA um kwah ban ïohsngew ba ki khynnah skul kim lah ban leit skul tang na ka daw jong ka jingbym biang ki iingskul. U la ong ruh ba ka Ranikor Constituency kan sa ïoh sa kumba 7-8 tylli ki ïingskul thymmai ha ryngkat ki paiñkhana na ka bynta ki skul sorkar lyngba kane kajuh ka projek.

U MLA ka Ranikor u la kyntu ruh ia ki kmie ki kpa ba kim dei ban shaniah tang ha ki nonghikai na ka bynta ban ai jingnang jingstad ia ki khun ki kti, hynrei ki dei ban iatrei lang bad ki nonghikai bad kim dei ban ailad ia ki khun ban pep skul.

Kiwei kiba la iadonlang ha kane ka jingialang ki kynthup ia u Sub-Divisional School Education Officer (SDSEO), u Bah S.S Lyngkhoi bad kiwei kiwei ki heh sorkar, ki nonghikai, ki khynnah skul bad ki briew na katei ka shnong.