Plie u Myntri ia ka Digital Learning Centre ban ai jingtip ia ki samla katkum ka juk

U myntri ka tnat Health & Family Welfare bad tnat sports u Wailadmiki Shylla mynta ka sngi ula plie ia ka Digital Learning Centre ha District Library Jowai, West Jaintia Hills, halor ka thong ban pyniar shuh shuh ia ki lad ioh jingnang jingtip katkum ka juk jingstad digital na ka bynta ki khun samla ka district.

Ha kane ka sngi la donlang u Deputy Commissioner ka West Jaiñtia Hills District u Abhinav Kumar Singh, IAS, ka Assistant Commissioner ka E. Ch. Momin, MCS, u Assistant Commissioner F.Passah, MCS uba la don mynta naba sdang ban pyniaid ia kane ka kam ha kaba dang shen ula shah kynriah noh sha East Jaiñtia Hills District, nangta u W. H. Gassah District Librarian Jowai

Ha kane ka Centre la don kumba 18 tylli ki kor computers ha ryngkat ka internet ba sted bad kane ka Centre dei kaba la bei pisa hapoh ka convergence with CM Catalytic Fund -Promoting Digital Learning and Inclusive Access to knowledge.

Ha kane ka Centre baroh kiba pynrung dkhot hapoh ka Library ki lah ban pyndonkam khlem jingsiew ei ei, kynthup ruh iaki khynnah skul, nangta ia kito kiba don ka thong ban iakhun shakhmat haka jingim, bad iaki dkhot nongialam shnong.

Ha kane kajuh ka sngi u myntri ula plie ruh iaka Book Fair ba arsngi bala pyniaid daka ophis u Deputy Commissioner ka West Jaiñtia Hills District hi ha phyllaw ka District Library.

U myntri haba kren u kyrmen ba kane ka digital learning centre kan long ka jingkyrkhu iaki khun samla ka district, ba kan kyntiew iaka jingmlien pule kot bad ba kan iarap ruh iaka jingiaid lynti shaka lawei.

U ong ba naka liang ka sorkar kala pyrshang katba lah ban pynbiang iaki jingdonkam jong ka mynta khamtam ha kane ka juk jingiakop donkam ban tip naka por shaka por ia kiei kiei ba jia ne don sawdong jong ngi khnang ban lah jam shakhmat haka jingim.

U kyntu ruh ban pyndonkam hok bad shim kabu ia kane ka Library khnang ba ka jingwanrah ka sorkar naka bynta ka jingmyntoi jongki hi kan ym sepei.

Bad ruh u kyntu iaki paidbah ban don iaka thong ba shalor, khnang ban lah pyndap iaki post ba donkam haka Jylla, namar ba ka jingkyrduh kam ka don tang haki kyrdan ba shatrai bad ba pdeng, katba iaki kyrdan ba kham shalor pat ym don briew napoh ka Jylla wat lada khot thep kam ruh da kaba u ai nuksa iaki post Doctor haka tnat jongka koit ka khiah

Ha kajuh ka por u pyntip ba ka thong jongka sorkar ym ban kut ka Library tang ha District Library hynrei kin sa pyrshang ruh ban plie iaki Library barit haki dong ki shnong.

Kumjuh ruh u kyrmen ba ka jingplie ia kane ka book fair ba arsngi ruh kan long ka jingmyntoi iaki paidbah.